447

İhmâl olunmayacak ve götürülecek kısraklar aygırların istihdâmınca kifâyet mikdârından ziyâde olmayacağından evvelce ta‘yîn olunacak mevâki‘in dâirelerinde ne kadar kısrak olduğunu bi’t-tahkîk mevâki‘ ve devâir-i ana göre ta‘yîn olunacaktır.

Aygırların tedârik ve tertîbi ve’l-hâsıl işbu ta‘lîmâtda münderic tedâbîrin ittihâzı mücerred sunûf-ı ahâlinin menfaati maksadına mebnî olduğundan gerek muhtârlar ve gerek me’mûrlar taraflarından aygırların i‘mâli mukâbilinde ve esbâb-ı sâire ile kimseden bir akçe alınmayacak ve şâyed alındığı tebeyyün eder ise ahzi kânûnen mücâzât görecektir.

Aygırlar mevsim-i i‘mâlleri hitâmına kadar mevâki‘-i muayyenede tevkîf edilerek götürülecek kısraklara çekildikten sonra me’mûrları ma‘rifetiyle yine merkez-i elviyeye celb olunacaklardır.

Kısraklar gebe kaldıktan sonra havanın şiddet-i bürûdet ve harâretinden muhâfaza olunmak ve tevellüd edecek erkek tayların iğdiç edilmesini ashâbı murâd ederler ise lâ-akal iki yaşına girmedikçe dokunmamak lâzım geleceği herkese ihtâr olunacaktır.

Beher sene aygırların kaç kısrağa takrîb olunduklarına ve mevsim-i tevlîdde kısraklardan ne mikdâr döl vücûda geldiğine dâir istatistik usûlü üzere her vilâyetten ikişer cedvel yapılarak Dâhiliye Nezâreti’ne irsâl kılınacaktır.

Fî 6 Muharrem sene 287