453

Ahz ile cemiyet-i umumiyenin mevk-i müzakeresine arz ederek verilecek kararı meclislere tebliğ ve mecalis-i belediyenin ilanât ve tebligâtını ve bütçelerini ve varidatının suret-i sarfına dair defterini ve sair her dürlü ilanâtı neşre me'zuniyet verir. Sâminen mecalis-i belediye reislerinin inhası üzerine senevî on iki bin kuruş ve ondan aşağı maaşı olan memurların tayin ve tebdiline muktedir olur.

Dokuzuncu madde: Kuvve-i askeriye ve zabıtaya lüzum gördüğü halde memurîn-i askeriye ve zabıtaya müracaat eder.

( Beşinci Fasıl )
( Şehremaneti Meclisinin vezaifi beyanındadır )

Onuncu madde: Şehremaneti Meclisi hem müzakere-i umur-ı idareye mütevellid deavinin fasl ve rü'yetine memurdur.

On birinci madde: Devair-i belediye memurlarından sirkat ve ahz-ı rüşvetle müttehem olanları bi'l-istintak Şûrâ-yı Devlet'e gönderecektir ve vergi afv ve tenzili ve menafi-i umumiye için lede'l-hace alınacak emlak tazminatı deavisi ve mecalis-i belediyeden icra ettirilen inşaat ve ameliyat müteahhidleri ile devair-i belediye arasında vuku bulan münazaat deavisini rü'yet ile karar verir ve esnaf meclislerinden verilecek ilamâtı nizam-ı mahsusuna bi't-tevfik rü'yet eyler ve sanayiin terakkiyatını mucib olacak surette esnaf nizamlarının ta'dil ve tesviyesine ve harik tulumbalarının taht-ı intizamda bulunmaları zımnında lazım gelen nizamâtın te'sisine ve âsâr-ı atika cem'iyle müze tertibine itina ve dikkat eder.

( Altıncı Fasıl )
( Şehremaneti Meclisinin suret-i teşkiline dairdir )

On ikinci madde: Şehremaneti Meclisi Şehremininin taht-ı riyasetinde olarak altı a'zadan ibarettir.

On üçüncü madde: Meclis-i mezkûrun a'zası taraf-ı devletten memur ve muvazzaftır.

On dördüncü madde: Reisin mecliste bulunmadığı gün Şehremaneti muavini riyaset vekâletini ifa eyler.