459

Elli beşinci madde: Meclis akdinde müzakerât-ı vâkıa zabt ve tahrir ve zabt ceridesi muvacehe-i huzzârda kıraat olunarak kabul ve tasdik olunduğu halde reis ve âzâ tarafından imza edilir.

Elli altıncı madde: Meclis kararı ekseriyet-i ârâ ile husûl bulur. Âzâdan iki zat taleb eyler ise rey-i hafîye müracaat kılınır.

Elli yedinci madde: Rey-i meclis reis dâhil olarak müsâvât üzere ikiye münkasim olur ise reis-i meclisin ve hazır olduğu halde reis-i sânînin reyi ne tarafta bulunur ise o tarafın reyi tercih olunur.

Elli sekizinci madde: Âzânın sülüsânı mevcûd olmadıkça bir madde üzerine karar verilemez ve fakat iki defa âzâ tahrîren davet olunarak matlûb olan aded-i âzâ hâsıl olmaz ise üçüncü davette her kaç olur ise olsun âzâ-yı mevcûdenin rey ve kararı makbûl ve muteberdir.

Elli dokuzuncu madde: Bilâ-mûcib sırasıyla üç defa gelmeyen âzâ istifa etmiş demek olacağından gerek o misillülerin ve gerek resmen istifası veyahut vefatı vukûbulan âzânın yerlerine Şehremaneti tarafından bi'l-istîzân cemiyet-i intihâbiyede en ziyade rey kazanmış olanların münasipleri tayin kılınır.

Altmışıncı madde: Her dairenin heyet-i memûriyeti ve mikdar-ı maaşları dairesinin vüs'atine ve mâlce iktidârına göre meclis-i beledîsi tarafından bi't-tertib Şehremanetine tebliğ olunur.

( On Üçüncü Fasıl )

( Reis-i sânînin sûret-i memûriyeti beyânındadır )

Altmış birinci madde: Her meclis ekseriyet-i ârâ ile iki reis-i sânî intihâb eyler. Reis-i sânîler meccanen ve bir sene hizmet ederler.

Altmış ikinci madde: Reis-i evvelin hazır bulunamayacağı vakitte reis-i sânîlerden biri meclisin in'ikadında riyâset eder.

Altmış üçüncü madde: Meclisde hakk-ı takaddüm reis-i sânîlerden intihâbda en ziyade rey kazanmış olana râcidir.

Fî 18 Cemâziye'l-âhır sene 1285