463

ve umur-ı zabtiye memurları dahi daire-i belediyeye müteallik nizamat-ı asliye ve mahsusa-i belediyenin icraatında işbu meclise her türlü ianeyi icra edeceklerdir.

On altıncı madde: İşbu daire-i belediyede irad ve masraf içün bir sandık ittihaz olunup bu sandığın hesabı yani dairenin varidat ve masarifi hulasaları beher sene meclis tarafından tanzim ve temhir ve imza ile Bâb-ı Âlî’ye takdim kılınup Meclis-i Vâlâ-yı Ahkâm-ı Adliye’de tetkikatı icra olunduktan sonra hulasaları daire içinde varaka-i mahsusalar ve gazeteler vasıtasıyla ilan kılınacaktır.

On yedinci madde: İşbu dairenin nizamat-ı esasiyesi altı ayda ve mümkün olabilir ise daha evvel tanzim ile meclisde bulunanlar taraflarından Bâb-ı Âlî’ye takdim olunup fakat bu nizamat-ı esasiyenin müzakere ve tayini sırasında ıslahatça icrası kabil olan mevaddı dahi Bâb-ı Âlî’den istizan ile icra edeceklerdir.

On sekizinci madde: İşbu meclisde bulunan azanın altı ayda nısfı çıkup yerine kur’a ile dördüncü maddede beyan olunan kaide ve usul üzere diğerleri tayin olunacaklardır.

On dokuzuncu madde: İşbu meclisin umur-ı tahririye ve muhasebesiçün iktiza eden ketebeyi meclis intihab edip Bâb-ı Âlî’den bi’l-istizan tayin olunacak ve maaşları daire masarifi içinde rü’yet olunacaktır.

Fî 11 Cemâziye’l-evvel sene 1274