469

Ve bundan mâadâ reîs-i meclis her kaç defa daha tensîb eder ise o kadar daha akdini emr edecektir.

Kırk üçüncü bend: Meclis-i mezbûrda müzâkere olunan husûsâtı ve karârgîr olan mevâddı ve hâzır bulunan âzâları ve dermiyân olunan reyleri ve ekseriyetin kangı cânibde olduğunu mütercimler Türkçe ve Fransızca olarak mazbata edeceklerdir.

Kırk dördüncü bend: Meclisin her defa in’ikâdında evvelki defasında cereyân eden müzâkerâtın mazbatası kırâat olunup tercümesi aslıyla mukâbele olunacak ve mütercimler tarafından imzâ olundukdan sonra reîs-i meclis bulunan zât ve âzâlar taraflarından dahi imzâ kılınacaktır.

Kırk beşinci bend: Zikrolunan mazbatalar imzâ olundukdan sonra yeniden tashihi için şâyet vukûbulacak teklîf ve iddiâ şâyân-ı kabûl ve îtibâr olmayacaktır.

Kırk altıncı bend: Âzâdan iki zâtın talebi üzerine meclis-i mezbûr sûret-i hafiyede dahi akd olunacak ve müzâkerâtının mazbatası âzâdan sinnen en küçük bulunan zât tarafından kaleme alınacaktır.

Kırk yedinci bend: Âzâdan hiçbiri sebeb-i gaybûbeti hakkıyla isbât etmedikçe âdî ve gayr-i âdî olan meclislerde hâzır bulunmadığından dolayı muâf olmayacaktır ve isbâta muktedir olmadığı hâlde defa-i evvelisinde yüz ve tekerrür vukûunda beş yüz kuruşa kadar cerîme itâ edecektir ve bu akçeler altıncı dâire dâhilinde bulunan fukarâya tevzî olunacaktır.

( İtâ-yı rey beyânındadır )

Kırk sekizinci bend: İtâ-yı rey husûsu ekseriyet ve kur’a-i hafiye usûlü ile icrâ kılınacaktır.

Kırk dokuzuncu bend: Meclisde lâ-akal dokuz nefer âzâ mevcûd bulunmadıkça itâ-yı rey olunmayacaktır ve dokuz âzâ mevcûd olduğu hâlde reyin kabûlü ekseriyete munhasır olacaktır.

Ellinci bend: Meclis-i mezbûrun akd ve küşâdı üçer gün fâsıla ile...