474

Yetmiş ikinci bend: Altıncı daire dahilinde bulunan ebniyenin aded ve kıymetlerini mübeyyin tanzim olunacak defter ikmal olunduğu anda marü'l-beyan mevad-ı esasiye hakkında dahi mufassal diğer bir kıt'a kanunname tertib olunub ba'de'l-müzakere Bab-ı Ali'ye beyan olunacaktır.

Yetmiş üçüncü bend: Harik tulumbalarının bir hüsn-i nizama rabtı memleketin havaic-i asliye ve mühimmesinden olduğuna ve virgü virenlerin dahi ihtiyar itdikleri fedakarlığa mukabil emniyetlerine bir zaman-ı kavi olacağına mebni işbu mevad-ı mühimmeye dair lazım gelen hususat meclis tarafından canib-i Bab-ı Ali'ye beyan olunarak ol babda iktiza eden ruhsat tahsil olundukdan sonra işbu tulumba hususunda mücerreb ve mahir adamlar tedarik olunarak iktizasının icrasına kemal-i dikkatle mübaşeret kılınacaktır.

Yetmiş dördüncü bend: İşbu tulumba maddesiçün başkaca bir kanunname dahi tertib olunub Bab-ı Ali'den istizan kılınacaktır.

Yetmiş beşinci bend: Tahrir-i emlak maddesi icra ve ikmal olundukdan sonra meclis-i mezburun mevad-ı hukukiyeye dair evrak ve senedatının idare ve muhafazasıçün bir kalem küşad olunacaktır.

( İstikraz maddesi beyanındadır )

Yetmiş altıncı bend: Daire-i Belediye Meclisi şayed ileride Devlet-i Aliye'nin emriyle lağv olunur ise o halde daire-i mezkure içün Saltanat-ı Seniye'nin ruhsat-ı aliyesiyle istikraz olunmuş olan akçeyi ve faizini Hazine-i Celile zamin olacaktır. Ve meclis-i mezbur dahi istikraz olunmuş olan meblağın hesabını virmekle mecbur olacaktır.

Yetmiş yedinci bend: Esbab-ı kaviyeye mebni meclisde hazır bulunmayan azanın işbu istikraz maddesi hakkında olan reyleri tahriren reis-i meclise gönderilerek müşarünileyh tarafından dahil-i zabta edilecektir.

Yetmiş sekizinci bend: Üç seneden ziyade müddet içün akçe istikraz olunmayub müddet-i mezkure zarfında dahi mebaliğ-i müstakrazenin karşılığı bulunacaktır.

Yetmiş dokuzuncu bend: Şübhe ve tehlikeli maddeler içün istikraz caiz olmayacaktır.