477

Doksan ikinci bend: Mecâlis içün îcâb iden vergilerin tahsîs ve ahâlinin nizâmât-ı belediyeye imtisâlleri kararlışdırılmış olan bi’l-cümle nizâmâtın meclisçe icrâsı husûsları lâ-akal bir ay evvel meclis-i beledî hânesinde i‘lânnâmeler ve gazeteler vâsıtasıyla cümleye i‘lân kılınacakdır.

( Nizâmât-ı munzame beyânındadır )

Doksan üçüncü bend: Meclis-i beledî hizmetinde bulunan sunûf-ı me’mûrînden biri hakkında da‘vâ vukû‘ buldığı hâlde meclis-i mezbûr re’îsi veyâhud mu‘âvini tarafına beyân-ı keyfiyet olunarak bunların birinden tahrîren ruhsat istihsâl olunmadıkça ol me’mûrun gerek zabtiye ve gerek sâ’ir tarafdan ahz ve girifti câ’iz olmayacakdır.

Doksan dördüncü bend: Meclis-i beledînin biz-zât kendü me’mûrları hakkında bir gûne da‘vâsı zuhûr etdiki takdîrde ahkâm-ı nizâmiyenin icrâsı-çün keyfiyet meclis-i mezbûr tarafından zabtiye nezâretine haber verilecek ve tervîc-i da‘vâ içün meclis-i mezkûr tarafından bir me’mûr-ı mahsûs gönderilecekdir.

Bend-i mahsûs: İşbu dâ’irelerin kâffesi teşekkül eylediki hâlde ittihâz olunacak kâ‘ide-i umûmiyeye altıncı dâ’ire dahi ittibâ‘a mecbûr olacakdır.

( İlâve )

Her dürlü meydân ve iskele ve sûr hendeki gibi mahallerin tasarruf-ı mahsûs ve hâllerinin tagyîri mutlakâ emr ve irâde-i seniye-i hazret-i pâdişâhîye menût olub bunların hâllerinin tagayyür etmemesine dikkat eylemek iktizâ eder ise bunları bi’l-istîzân ve menâfi‘-i umûmiye ve tezyînât-ı belediyeye muvâfık olacak sûretle isti‘mâl etmek idâre-i belediyenin me’mûriyeti iktizâsındandır ve bu makûle mahaller bâlâda beyân olunan kâ‘idenin hilâfına olarak satılmış veyâ hâlleri tagyîr edilmiş ise bunları da‘vâ ile hilâf-ı kâ‘ide vukû‘bulan isti‘mâlâtı fesh edilerek idâre-i mahsûsasına almağa me’zûndur.

Fî 24 Şevvâl sene 1274