48

Beşinci Madde Gerek iltizama verilmiş ve gerek emanete kalmış olsun bir karyeye bir mültezim veyahut emanet memuru gecikerek vaktile gelmeyip de harman zamanı dahi hulul ederek bunun vürûduna intizar ile harmanların kaldırılamamasından telefata uğranılacağı tahakkuk ettiği halde ol karyenin muhtarıyle ihtiyar meclisi mültezime veyahut mirîye âid olan âşârı bir gûne hile ve fesad karıştırılmaksızın tefrik ile harmanları kaldırmağa mezun olup fakat bu halde her kimden ne mikdar âşâr alınmışlar ise ale’l-müfredât bir defter-i sıhhat eserini tutup temhir edecekler ve âşâr-ı mezkûreyi emin ve mahfuz bir mahalle vaz’ ile güzelce hıfz ederek zikr olunan mültezim veyahut emanet memurunun vürûdunda bâ-defter ve sened bu kadar edecekler ve mültezimler vaktile gelmediği halde harmanların kaldırılması maddesine itiraz edemeyerek hâsılat-ı müddahareyi alıp bedel-i âşârı te’diye eyleyecekdir.

Altıncı Madde Bi’l-cümle vülât ve defterdârân ve mutasarrıfîn ve küçük ve büyük memurîn-i mülkiye emvâl-i hazîne-i celîlenin telef ve israfdan vikâyesi ve vakti ve zamanile tahsil ve istifâsı esbâb-ı kaviyesinin istihsâline memur ve mecbur olduklarından zîr-i idarelerinde bulunan mahallerin âşâr ve rüsûmâtını kefâlet-i kaviye tahtında olarak ihâle ve iltizâm edecekler ve bu bâbda lazım gelen takyîdâtın icrâsı emrinde kusur ve tekâsül vukûile hazîne-i celîleye terettüb edecek zarar ve ziyandan hasebe’l-me’mûriye mes’ûl olacaklardır.

Yedinci Madde Vâridât-ı uşriyenin müzâyede ve ihâlesi hakkında mevzû olup şimdiye kadar düstûrü’l-amel olan nizâmâtın işbu tâlimâta mugâyir olan mevâddı terk olunup mevâdd-ı sâiresi kemâ-kân bâkî ve mer’iyyü’l-icrâ tutulacaktır.

— ( * ) —

[ Hazîne ]