480

On dördüncü bend: Sokaklarda yanan gaz fenârlarının idâresi hakkında iktizâ eden masârif meclis-i beledî tarafından tarh olunacak âdi vergiden tesviye kılınacaktır.

On beşinci bend: Zikr olunan fenârların îrâd ve masârifi husûsları meclis-i beledîye râci‘ olacağından dâire-i belediye mühendishânesinden istid‘â ve istihsâl-i ruhsat olunmadıkça hiç bir kimse müstakil olarak gaz borusu yaptırmağa salâhiyeti olmayacak ve istid‘â olunduğu takdîrde yapılacak şeylere me’mûrlar tarafından nezâret olunacaktır.

On altıncı bend: Gaz borularına ve musluğuna her kim dokunur ise velev bir gûne zarar ve hasâr olmasa bile buna cür’et eden kimse cezâ kânûnnâme-i hümâyûnunda kabâhatin nihâyet derecesi olan on beş beşlikden yirmi beşliğe kadar cezâ-yı nakdî ahzıyla mücâzât olunacaktır ve zarar olduğu takdîrde zikr olunan mücâzât-ı nakdiyeden başka ol zarar dahi tazmîn ettirilecektir.

( Lağım yollarına dâir mevâdd beyânındadır )

On yedinci bend: Kadîmî sûretde kaldırım yapılacak sokaklarda resm-i mukarrer üzere vus‘atli ve i‘tinâlı ve muhkem olarak lağım yolları inşâ olunacaktır.

On sekizinci bend: Merkez-i dâire-i belediyenin kuvvet-i mâliyesi tekessür etdikçe el-hâletü hâzihi bulunan lağım yolları ve husûsiyle matlûba muvâfık olmayanları tebdîl olunarak anların yerine nâsın sıhhat-i vücûduna mazarratı olmayacak sûretde merkez-i beledî tarafından intihâb olunacak usûl üzerine yeniden lağım yolları yapılacaktır.

On dokuzuncu bend: Lağım yollarıçün yapılacak bodrumların masârif-i inşâiyesi merkez-i beledî tarafından tarh olunan fevkalâde vergiden tesviye olunacak ve anların temizlenmesi ve ta‘mîri içün iktizâ eden masrafı dahi âdi vergiden te’diye kılınacaktır.

Yirminci bend: Belediye mühendishânesinden ruhsat tahsîl olunmadıkça lağım yolunun tathîr ve ta‘mîrine kimse tarafından teşebbüs olunmayacaktır.