498

Hayvanatın nevi ve adedi mübeyyen bir defter yapılıp ve mahalle muhtarlarına dahi temhir ettirilip şehremanetine teslim eyleyeceklerdir. Hristiyan mahallelerinde bu hizmeti mahalle muhtarı ile mahalle kethüdası görüp yüzde iki buçuk tahsildariye dahi anlara ait olacaktır.

Dördüncü madde: Altıncı daire dahilinde hanelerde bulunan hayvanatın vergileri daire-i merkûme tarafından bittahsil yüzde iki buçuk tahsildariye dahi daire-i merkûmeye ait olacaktır.

Beşinci madde: Kira araba ve hayvanlarıyla sair esnafda olan hayvanatın vergileri alelumum kethüdaları marifetiyle şehremaneti tarafından tahsil kılınacaktır.

Altıncı madde: Üçüncü maddede beyan olunduğu üzere beher ay başında vuku bulan tahsilatın alelesami defteri şehremaneti behiyesi tarafından mahalle imamlarına ita olunacak nümunesine tatbikan tanzim kılınacak ve canib-i emanetden dahi bir kıt‘a top icmal defteri terkim ile defatir-i mütekaddime-i mezkûre ile beraber hazine-i celileye takdim olunacaktır. Ve beher mah nihayetinde her kimin zimmetinde bakaya kalmış ise mahalle imamları tarafından şehremanetine ihbar ile o makulelerin derhal canib-i emanetden tahsiline müsaraat ve ibtidar kılınacaktır.

Yedinci madde: İmamlar ile mahalle muhtar ve kethüdaları zimmetlerine akçe geçirirler ise ceza kanunname-i hümayunu hükmünce mücazat olunacaklardır.

Sekizinci madde: Bu babda bir gûne mektûmat vuku bulur ise eimme ile muhtar ve kethüdalar mesul olacakları misillü bu suretle müddet-i mektûmiyetde ashab-ı hayvanat uhdesinde tebeyyün eden zimmet iki kat olarak tahsil olunacaktır. Ve itadan imtina edenlerin maaşları veyahud sehm ve mukataa taksitleri var ise mahsub olunup olmayanların dahi akaratı canib-i miriden sekostru edilecek veyahud diğer suretle tahsil kılınacaktır.

Fi 1 Muharrem sene 1281
* Suret *