500

Mezkûr mahallerde yani Boğaziçi’nde sokak üzerinde ebniyesi bulunan sahilhaneler ashabı taraflarından mezkûr ebniyenin hedmiyle müceddeden inşasına dahi ruhsat verilir. Ancak bu halde tarafında bulunan komşuları harikinden muhafaza edecek surette kârgir duvar inşa etmek veyahut komşularının haneleri taraflarında otuzar arşın arsa-i haliye bırakmak lazımdır ve bu binaların küçüklüğü eskiden bulunduğu miktarı tecavüz etmeyecekdir ve eğer binalar bir kaç kısmı müştemil ise kısımların yekdiğeri arasında onar arşın ve ittisalinde bulunan sahilhanelerin hududundan itibaren iki tarafında dahi la-akal beşer arşın fasıla bırakılacakdır.

Üçüncü Madde
Birinci maddede gösterilen vüsat için icab eden yerler yolun her tarafından nısfiyet üzere alınır ve yalnız bir tarafında ebniye inşa olunan sokaklarda nizamen terki lazım gelen miktar yerin nısfı o taraftan alındıkdan sonra nısf-ı âharı dahi karşı sırada ebniye inşa veyahut tecdid olunduğu vakit alınacakdır. Böyle tevsi-i tarik için alınacak yerler ashabı tarafından meccanen terk olunacakdır. Nizamen lazım gelen yeri terk ile inşa kılınmış olan ebniyenin işbu nizama dahil olduğu bilinmesiçün zemin katı yüzünün görünecek bir mahalline bir levha-i tevsi'iye vaz’ olunacak ve bu levhanın vücudu ol ebniyenin artık hasbe’n-nizam tevsi-i tarik için gerü çekilme mecburiyeti olmadığına emniyet verecekdir.

Dördüncü Madde
Vüsati balada beyan olunan nizama mutabık veyahut daha vasi bulunan sokaklar heyet-i asliyeleri üzere kalacak ve hiç bir kimse bir vesile ve daiye ile sokağa tecavüz edemeyecekdir.

( Sokakların İstikameti )

Beşinci Madde
Üçüncü ve dördüncü maddelerin ahkamı henüz istikamet haritası yapılmamış olan sokaklar hakkında cari olup sekizinci maddede beyan olunacağı vechle bir tarik-i istikamet üzere haritası kat’iyen kararlaştırıldığında keyfiyeti mu’len tarik-i mezkûrun başına bir levha-i istikamet ta’lik olunacak ve ol tarikın boyunda inşa veyahut tecdid olunacak ebniye harita-i mezkûre mucibince yapılacakdır. İşbu haritanın icrasında istikamet

Mülâbese