522

Muavini bakmayacak olduğundan muavin-i mumaileyh bu babda keşf me'murlarını istihdam edecek ise de me'murin-i mumaileyhim doğrudan doğruya emr veremeyüb müdir-i mumaileyh tarafından emr verdirecekdir ve a'malat-ı mezkûreye dair vukubulan keşflerin tedkikatı muavin-i mumaileyh tarafından icra olundukdan sonra meclis-i maâbire havale olunacakdır.

( İkinci Fasıl )
( Ebniye Meclisine Dâirdir )

Dördüncü Bend: Ebniye meclisinin vazaifi ikiye münkasim olub birincisi müdir-i mumaileyh tarafından ebniye umuruna dair havale olunacak kâffe-i hususat hakkında re'y vermek ve ikincisi dahi ashab-ı emlak ile kalfa ve kalfalar ile amele beyninde mukavelat ve taahhüdatdan dolayı zuhur edecek münazaat ile muhterik arsaların yeniden hin-i taksiminde Ticaret Nezaretine tahriren vukubulacak şikayatı istima' ve deavi-i vakıayı muhakeme edecek ve turuk ve ebniye nizamnamesiyle harc ve rüsumat nizamnamesine mugayir bulunan kabahat davalarını kat'iyyen hükm ve i'lam eyleyecekdir.

Beşinci Bend: Ebniye meclisi meclis-i mezkûr reisi bulunan Ebniye Müdiriyle Ebniye Muavini ve salifü'z-zikr dört me'muriyet reislerinden terekküb edecek ve keşf odası baş me'muru meclis-i mezkûrun umur-ı tahririyyesine dahi nezaretle beraber maiyyetinde bulunan keşf me'murlarını icabı vechle istihdam eyleyecekdir.

Altıncı Bend: Muhakemenin günü ve vakt ve saati muayyen olub mevad-ı saire içün dahi Ebniye Müdirinin daveti üzerine akd-i meclis olunacakdır.

Yedinci Bend: Meclis-i mezkûr bir madde hakkında hükm ile i'lam vermezden evvel tarafeyni celb ile senedat veyahud kontrato veyahud görülmesi iktiza edecek sair bi'l-cümle evrakı mütalaa birle lüzum göreceği keşf ve tahkikatı keşf me'muriyetinde bulunan kalfa veya mühendislerden me'murlar tayiniyle icra ettirecekdir.

Sekizinci Bend: Meclis kâffe-i deavi hakkında ekseriyet-i ara ile hükm etmesi lazım.