523

Lazım geldiğinden bir madde hakkında ârâ müsâvi olduğu halde rüchâniyet reisin bulunduğu tarafda olacak ve bu i'lâmın mer'i ve mu'teber olması içün meclisde lâ-akal üç a'zânın vücûdu lâzım gelecekdir.

Dokuzuncu bend
Dördüncü bendde beyân olunan kabahat da'vâlarından mâ'adâ husûsâtda ebniye meclisinin vereceği i'lâmât üzerine ashâb-ı mesâlihin nakl ve istinâf-ı da'vâya salâhiyetleri olub bu bâbda olan istid'âları mezkûr i'lâmlarla berâber işbu i'lâmlar târîhinden i'tibâren bir ay zarfında Ticâret Nâzırına takdîm olundukdan sonra nâzır-ı müşârünileyh bunları Ticâret Nezâretinde bu makûle mevâddın kat'an fasl ve rü'yetine me'mûr olan İstinâf Dîvânına gönderecekdir.

( Üçüncü Fasl )
( Tesviye-i Turuk Me'mûriyetine Dâirdir )

Onuncu bend
Tesviye-i turuk me'mûriyeti turuk ebniye nizâmnâmesine tevfîkan Dersaâdet ve bilâd-ı selâsede her nev' ebniye inşâ veyâhud ta'mîrâtı içün vâkı' olacak ruhsat ve me'zûniyet istid'âlarının rü'yetiyle iktizâ eden levha-i tesviye ve levha-i istikâmet i'tâsından ibâretdir.

On birinci bend
Tesviye-i turuk me'mûrları ikinci bendde mezkûr olan baş me'mûr ile duvar baş me'mûrları olan kalfadan ve mülâzımlar refîklerinden ve müsevvid ve defterci ve mübeyyiz refîk ile müte'addid çavuş ve mubâşirlerden ibâret olacakdır.

On ikinci bend
Tesviye-i turuk me'mûrları ticârethânede olmak üzere bir kalem ile Dersaâdetin münkasim olacağı dâirelerde küşâd olunacak aklâm-ı mahalliyeye münkasim olarak mezkûr kalem doğrudan doğruya tesviye-i turuk baş me'mûrunun idâresinde olduğu halde lüzûmu mikdâr ketebe ve mubâşirlerden mürekkeb olacak ve mezkûr dâireler kalemlerinin her biri bir halîfe ve bir kâtib ile bir çavuşdan ibâret olacakdır.

( Dördüncü Fasl )
( Mesâha Me'mûriyetine Dâirdir )

On üçüncü bend
Mesâha me'mûriyeti muhterik arsaların eski sokaklariyle...