525

Kalfa veyahut mimar dahi bulunup şöyle ki bunların defteri beher sene baş mâmur tarafından tanzim ve Ebniye Meclisi canibinden tasdik ve kabul ile tayin olunacaklardır.

( Altıncı Fasıl )
( Muhasebe Mâmuriyetine Dairdir )

On dokuzuncu bend: Ebniye muhasebesi mâmuriyeti her nevi ebniyeden nizamname-i mahsusunda zikrolunduğu vechile ahz ve tahsil olunacak harç ve rüsumat ve mugayir-i nizam hareketden dolayı istihsal kılınacak cezay-ı nakdi ile vuku bulacak masarifatın ve Ebniye İdaresinin şubat-ı muhtelifesinin makbuzat ve medfuat defterinin tanzimi ve varidatın kabz ve sarfı hizmetinden ibarettir.
İşbu muhasebe mâmuriyeti tarafından verilecek bilcümle makbuz senedatı koçanlı defterlerinden kat’ olunacak ve alınan harç ve rüsumatın mikdarı ol senedlerde huruf ve ibare ile muharrer bulunacaktır.

Yirminci bend: Muhasebe mâmurları baş mâmur ile bir muhasebeci ve lüzumu mikdar muhasib, ketebe ve defterci ve mübeyyiz ve mübaşirden mürekkebdir.

( Yedinci Fasıl )
( Teftiş ve Tecessüs Hakkındadır )

Yirmi birinci bend: Ebniye mâmurlarından her biri zir-i idaresinde bulunan bilcümle mâmurların umur-ı mâmurelerini dikkat-i kâmile ile ifalarile nazamat-ı mevzuayı tamamıyla icra ettirip ettirmedikleri hususlarına dikkat ve nezaret edecektir.

Yirmi ikinci bend: Ticaret Nezaretinin doğrudan doğruya emri altında olarak ve Ebniye İdaresinin hidemat-ı mütenevviasını tecessüs ile mâmurinin ne suretde ifay-ı mâmuriyet eylediklerini Nezaret-i Müşarünileyhaya bildirmek üzere bir veya bir kaç teftiş mâmuru tayin olunup bunların ashab-ı emlak ve gerek Ebniye İdaresinin ba’zı mâmurları tarafından nazamat-ı mevzuaya riayet olunmadığına dair Nezaret-i Müşarünileyhaya vaki olacak bilcümle şikayet ve ihbaratı tahkik ve tedkik edecekler ve Divan-ı İstinaf azasından madud olacaklardır.