528

( Ekmekçilik hakkında nizamnamedir )

( Fasl-ı evvel ekmekçilerin umur-ı idaresiyle vezaifine ve nan-ı azizin )
( Suret-i tabh ve füruhtiyle fırınların ne suretle )
( Tanzim olunmasına dairdir )

Birinci madde: Şehremanetinden ruhsat istihsal eyleyen her bir şahs ekmekçilik san'atını icraya me'zundur.

İkinci madde: Mevcud ekmekçiler ve ekmek tabh ve imal etmekde bulunan simitçi ve börekçiler işbu nizamnamenin ilan tarihinden bir mah gayetine kadar Şehremanetinden ruhsatname ahz edecekler ve bir ruhsatname içün kaydiye namiyle Şehremaneti sandığına derece-i iktidarlarına göre yüz veyahud elli guruş vereceklerdir ve bundan böyle ekmekçilik san'atını icra içün fırın işleteceklerle ekmek tabh ve imal edecek simitçi ve börekçiler dahi ol vechle kaydiye itasıyla ruhsatname istihsaline mecburdurlar.

Üçüncü madde: Fırın ekmekçileri ekmekçiliği terk etmek istediklerinde bir ay evvel ihtarnamiyle Şehremanetine haber vererek ruhsat istihsaline mecburdurlar o mislülerin ruhsatını alıncaya değin küll-i yevm fırınından çıkarmakta olduğu ekmeğin imal ve ihracına bila-kusur devam edecek ve esbab-ı mücbire olmadığı halde terk-i san'at edenlerden bila-ruhsat fırınını kapayıb fırının sermayesi nisbetinde beşden on beş Osmanlı lirasına kadar ceza-yı nakdi alınacaktır.

Dördüncü madde: Fırın ekmekçileri ruhsatnameyi ahz eylediği tarihden itibaren iki maha kadar icra-yı san'ate başlamaz ise bir lira ceza-yı nakdi alınacağı gibi yedinden ruhsatnamesi dahi istirdad olunacaktır.

Beşinci madde: Mevani-i mücbireye uğramaksızın me'zuniyet-i mahsusası olmadığı halde fırınını iki gün kapayan ekmekçiden üçüncü madde mucibince ceza-yı nakdi alınacak ve tekerrürü halinde ceza-yı nakdinin ahzıyla beraber kendisinin tekrar ol fırını açmağa salahiyeti olamayacaktır ve Habbazan Meclisinin keşf