574

Otuz yedinci bend
Eşya-yı mezkûreyi her kim olur ise olsun iştirasına rağbet eylediği halde müzayede edilecek gün ve vakti bilip ona göre bizzat kendisi gelerek veyahut tarafından birini göndererek müzayedede pey sürebilmek içün eşya-yı merkûmenin ne makule eşya olup kangı gün ve kangı saatde müzayede edileceği bir hafta mukaddemce iktiza eden pusulası Ceride-i Havadis ile Jurnal do Konstantinopl matbaalarına gümrük emaneti tarafından bil-irsal tab ve ilan ettirilecektir (5)

( Li-ecli't-ta'mir gelecek ve gidecek eşyaya dairdir )

Otuz sekizinci bend
Li-ecli't-ta'mir harice gönderilecek olan veyahut Dersaadet'e celb edilmiş bulunan mücevherat ve altın ve sim edevat ile eşya-yı saire ashabı tarafından mensub olduğu gümrüğe getirilip ibraz ve irae ile ol eşyanın mukaddema gümrüklerden imrar olunarak resm-i gümrüğü ifa kılındığını beyan ile kuyuda bil-müracaa sabit olduktan sonra cins ve aded ve miktarı ve ashabının esami ve şöhreti sebt-i defter olunarak irsal veyahut idhaline ruhsat verilecektir (4)

Otuz dokuzuncu bend
Eşya-yı mezkûre ba'de't-ta'mir celb olundukda veyahut Dersaadet'de ta'mir olunarak iade kılınmak istendikde kezalik mensub olduğu gümrüğe getirilip ibraz ve irae ile kaydına müracaat olundukda tevafuk ettiği halde bilâ-resm imrarına ruhsat verilecektir ( Mensuhdur )

Kırkıncı bend
Evani-i sim ve zer kaydına tevafuk edip de ta'mirden naşi fazlası zuhur eylediği halde yalnız zuhur eden fazlasının gümrük rüsum-ı icabiyesi ahz olunacaktır ( Mensuhdur )

Kırk birinci bend
İbtida geldiği vakit resm-i gümrük alındığı malum olmayan salifü'z-zikr eşya bu nizamdan müstesna tutularak sair eşya-yı müsta'melenin

( 5 ) Aynen alınan eşyanın tecdid-i muahede olunduktan sonra gümrüğe mal olacağı kıymetle satılması mukarrer olduğundan bu bendin hükmü yoktur

( 4 ) Tecdid-i muahede olunduktan sonra bu bendin hükmü münfesih olmuştur
Taşra