590

Gerek transit ve gerek idhâlât olsun îcâb iden resmiñ iki katı
istihsâl kılınacakdır.
Eşyâ-yı ticâriyesini Memâlik-i Mahrûse-i Şâhâne içinden imrâr içün bâlâda
zikr olundığı vechle transit tezkeresini almış olan tâcir veyâhûd vekîli
tezkere-i mezkûreyi altı mâh mehil içinde ve mümkün olur ise dahâ evvelce
gümrüge getürüb iâde idecekdir.
Ol vechle iâde olunacak tezkere eşyâ-yı ticâriye-i mezkûreniñ fi'l-vâkı'
diyâr-ı ecnebiyeye imrâr ve idhâl olunmuş oldığını müş'ir olarâk Devlet-i 'Aliyye'niñ
eñ soñraki mahrec gümrügi tarafından zahriye idilmiş oldığı hâlde iâde
olunacakdır.
Sâniyen zikr olunan transit tezkeresi 'ahdnâme-i ticâret mûcibince îcâb
iden transit resm-i gümrüginiñ istihsâlinden soñra virilecegi derkâr ise de
ber-vech-i muharrer eşyânıñ Memâlik-i Mahrûse-i Şâhâne'den hurûc ile diyâr-ı ecnebiyeye
duhûl etdigini isbât içün sâlifü'l-beyân altı mâh mehil içinde tezkere-i
mezkûreyi mahrec gümrügi tarafından zahriyeli olmak üzere getürüb iâde
idecegine eşyâ-yı mezkûreniñ sâhibi olan tâcir gümrügüñ kabûl idecegi
muktedir bir kefîl irâe idecek ve mehil-i mezbûr içinde tezkere-i mezkûre öyle
zahriyeli olarâk ibrâz idilemedigi takdîrde tâcir veyâhûd vekîli yüzde
sekiz idhâlât resminiñ üst tarafı olan meblağı gümrüge te'diyeye mecbûr olacakdır.
Ve eger ki tâcir eşyâsınıñ Memâlik-i Mahrûse-i Şâhâne'den hurûcını isbât içün
kefîl virmeyüb de ba'de farkını istirdâd itmek üzere gümrüge te'mîn sûretiyle
resm-i idhâlâtı kâmilen te'diye itmegi tercîh ider ise o hâlde transit resmiyle
idhâlât resmi beyninde olan fark-ı mezbûruñ tâciriñ matlûbı üzere mevrid
gümrüginde mi yohsa mahrec gümrüginde mi red olunacağı virilecek tezkerede
tasrîh kılınacakdır.
Fark-ı mezbûruñ reddi mevrid gümrüginde icrâ olunacağı tezkere-i mezkûrede muharrer
oldığı takdîrde eşyânıñ diyâr-ı ecnebiyeye ihrâc olunmuş oldığına dâ'ir mahrec
gümrüginden zahriye kılınmış olan tezkere-i mezkûre bâlâda beyânı sebkat iden
mehil içinde mevrid gümrügine getürilüb iâde olunacakdır.

Zikr