597

(Mahsulât ve mamulât-ı dahiliyeden diyar-ı ecnebiyeye götürülmek)
(üzere gümrük iskelelerine tevarüd edecek eşya)
(hakkında nizamname)

Memalik-i Mahruse-i Şahane mahsulât ve mamulâtından diyar-ı ecnebiyeye ihraç edilmek üzere içerülerden iskele gümrüğü olan mahalle tevarüd edecek eşya hakkında gümrükçe olunacak muamelât-ı nizamiyeyi mutazammın beyannamedir.

Diyar-ı ecnebiyeye ihraç olunmak üzere iskele gümrüğüne vürud edecek eşyay-ı ticariyeyi resm-i gümrüğünü vermeksizin kendi mağazasına nakl etmeyi isteyen tacir eşyay-ı mezkûreden sarfiyat-ı dahiliye itibarı üzere iktiza edecek yüzde sekiz resm-i gümrüğün miktarını mutazammın ve eşyay-ı mezkûrenin diyar-ı ecnebiyeye ihraç olunacağını mübeyyin olmak üzere zikr olunan gümrüğe bir kıt'a sened verecektir.

Tacir-i markum öyle bir sened vermek istemediği halde zîrde beyan kılınan şukûk-ı erbaadan birisini ihtiyar ile icra etmeye mecbur olacaktır.

Evvelâ eşyay-ı mezkûresini mağazasına götürmeyerek doğruca derhal diyar-ı ecnebiyeye irsal edecektir.

Sâniyen yahud gümrüğün anbarı var ise eşyay-ı markumeyi anbar-ı mezburda terk edecek ve o halde kendisinden ardiye resmi istenilecek ve ammâ eşyay-ı mezkûreyi anbar-ı mezburda bir müddet terkden sonra diyar-ı ecnebiyeye irsalinden sarf-ı nazar birle derun-ı memleketde sarf ve istihlak olunmak üzere gümrükden çıkaracak olur ise o vakit icab eden resm-i ardiyeyi tamamâ eda edecektir.

Sâlisen veyahud eşyay-ı mezkûreyi miftahın birisi gümrüğün yedinde kalmak üzere iki miftah ile kilitlenip açılır bir başka mağazaya vaz' edecek ve gümrük idaresi ister ise bunun kapısını kendi mührüyle mühürlemeye muktedir olacaktır.

Râbian veyahud sarfiyat-ı dahiliye resmi olan yüzde sekiz gümrük resmini depozito suretiyle gümrük idaresine verip eşyay-ı mezkûresini gümrükden