6

Onuncu Madde: Efrad-ı mükellefînin her birisi mürettebat-ı mîriyeden hissesini muayyen olan vakti te’diyesinde muhtarına götürüb bi’t-teslim makbuz pusulası alacakdır.

On Birinci Madde: Efrad-ı mükellefînin muhtarlara vukûbulan teslimatı vakti te’diyeden lâ-akal üç gün içinde kaza sandığına ifa kılınacakdır.

On İkinci Madde: Mahalle ve karye mürettebat-ı mîriyesi hissesinin vakti te’diyesinde muhtarın sandığa teslim edeceği akçe taksitin mecmuuna mukabil olmaz ise noksanı kimlerin zimmetinde olduğu beyan edecekdir.

On Üçüncü Madde: Mahalle ve karye muhtaranının kaza sandığına teslim edeceği akçelerin noksanı zimmetlerinde bulunan efrad-ı mükellefînden istifa kılınmak üzere kaza tarafından tahsil içün adam gönderilüb muamele-i nizamiyesi icra olunacakdır.

On Dördüncü Madde: Bir mahalle ve karye muhtarı sandığa akçe teslim olunacağı müddeti geçirir ise ol mahalle ve karye içün adam gönderilüb te’ahhur-ı teslim muhtardan zuhur etmiş ise anın ve efrad-ı mükellefînden vukua gelmiş ise anların haklarında kezalik muamele-i nizamiyesi icra kılınacakdır.

On Beşinci Madde: Mahalle ve karye muhtarları kaza sandığına teslim etdikleri akçe ne nevi maldan ise yirminci maddede beyan olundığı vechle mazbatası zahrına teslimini yazdıracakdır.

( Fasl-ı Sâni )
( Kurada Emvâl-i Devletin Sarfı )

On Altıncı Madde: Mahalle ve karyelerde emvâl-i devleti hiç bir kimse ne bir yere sarf etmeğe ve ne de teavuz ve karz suretiyle bir kimesneye vermeğe muktedir değildir.