654

Sahibi bâlâda zikr olunan şahâdetnâme yerine kendü ismini ve tütün balyalarının
mikdâr vezniyle marka ve numrolarını ve târîh-i vürûdlarıyla oradan vakt
ü vezniye tekrâr irsâl olundığını mübeyyin sâlifü'l-beyân gümrükden bir dîger şahâdetnâmeyi
getürüb ibrâz idecekdir şurası dahi mukarrerdir ki bu misillü duhân sâhibleri
şahâdetnâme-i mezbûrun celb ve ibrâzıyla tebrie-i zimmet idemeyüb bundan başka
tütünün vâsıl oldığı mahalden dahi bâlâda zikri geçdiği minvâl üzere oradan
transit sûretiyle imrâr olundığını veyâhud resm-i gümrük istihsâl kılındığını
müş'ir mârü'z-zikr bir sene müddet zarfında dîger bir şahâdetnâme getürmege mecbûr
olacaklardır tütün sâhibi zikr olunan şahâdetnâmeyi bir sene zarfında
getüremeyüb de temdîd-i müddet olunması ârzûsunda bulunduğu takdîrde kendü ismini
ve tütün balyalarının mikdâr vezniyle numro ve markalarını ve yevm-i vürûdlarıyla henüz
gümrükden çıkmayub anbarda bulunduğu zikrini hâvî mahal-i vusûlünden
bir şahâdetnâme ibrâz eylemek şartıyla istid'âsına gümrük tarafından müsâade
olunacakdır

Memâlik-i Mahrûse mahsûlü olan tütünler diyâr-ı ecnebiyede duhân gümrüğü olmayan
limanlara idhâl olunarak orada sarf ve istihlâk olunmak üzere bey' ve fürûht
olunmış bulunursa zikr olunan şahâdetnâmeler liman-ı mezbûrda gümrük bulunmayacağı
cihetle orada mukîm Devlet-i Aliyye şehbenderleri tarafından hasbî olarak
hîn-i talebden i'tibâren yirmi dört sâat zarfında i'tâ olunacakdır

Tütün sâhibi gümrüğün ma'rûfu bir âdem olmadığı takdîrde işbu dördüncü mâdde
mûcibince vireceği senedden başka kangı teb'adan olur ise olsun gümrük
tarafından kabûl olunabilecek bir tâciri kefîl göstermeğe ve eğer böyle bir kefîl
gösteremeyecek olur ise resm-i mürûriyi depozito itmeğe mecbûr bulunacakdır

Beşinci Mâdde: Bir devlet-i ecnebiyeye mîrî içün olarak mübâya'a olunan duhâna
gelince bunın mahal-i vusûlünden getürülecek şahâdetnâmede yalnız duhân-ı mezbûrun
devlet-i mezkûre idâresine teslîm olunmış oldığı münderic bulunacakdır