710

Hissesi tefrik olunarak iki yüz kıyyeden ziyade ne kadar hamr imal olunur ise ol kadarı kayd olunacaktır. Ancak kefaf-ı nefs içün terk olunan bu iki yüz kıyyeden bir mikdarını amili fürûht etmek istediği halde fakat fürûht olunan mikdarın resm-i mîrîsi ahz ve tahsil kılınacaktır.

Altıncı Bend: Hamr ve arakın sebt-i defter olunan resm-i mîrîsi memuru marifetiyle ceste ceste şubat gayetine kadar kâmilen tahsil olunmak üzere herkesin resm-i mîrîden dolayı zimmetlerini mübeyyin yedlerine birer pusula verilecektir.

Yedinci Bend: Ber-minval-i muharrer yapılacak defter iki nüsha olarak tanzim olunub biri memuru yedinde ve diğeri kaza meclisinde bulunacak ve hamr ve arak imal olunan her karye ve kasabanın esamisini ve yapılan hamr ve arakın mikdar ve fiyatını ve resm-i mîrîsinin yekûnunu mübeyyin zîri mazbatalı bir kıt‘a hulâsa defteri yapılarak re’s-i livaya gönderilecektir.

Sekizinci Bend: Re’s-i eyalet ve liva olan kazalarda dahi kaide-i meşruhaya tevfikan hareket olunacak ve mülhak kazalar ile bizzat idare olunan kazalarda yapılan hamr ve arakın mikdar ve fiyatı ve resm-i mîrîlerinin yekûnu başka başka gösterilerek zîri mazbatalı bir kıt‘a hulâsa defteri tanzim ile maliye hazine-i celilesine irsal kılınacaktır.

Dokuzuncu Bend: Resm-i mîrî tahsil olundukça defterdeki esamisi tahtına ve ashabı yedlerinde ki pusulalara memuru tarafından işaret olunacaktır.

Onuncu Bend: Bir kere resm-i mîrîsi verilen müskirattan fîmâba‘d resm-i mîrî mutalebe olunmayacağından resm-i mîrîsi verilmiş olan müskirat sene-i âtiye defterine geçmemek içün mahsul-i cedid idrakiyle sene-i cedide istimarasından bir mâh mukaddem evvelki senenin mevcud olan müskiratı bir kere daha muayene olunarak baki mikdar ise ayrıca zabt kılınub şubat gayetine kadar resm-i mîrîleri kâmilen istifa ve tezkireleri ita olunacak ve sene-i cedide istimarasında geçen senenin müskiratı müstesna tutulacaktır.

On birinci