711

On birinci bend: Fabrikalarda kuru üzüm ve incir ve rum ve saireden imal olunan arakdan evvel emirde eczası vezn kantar olunarak kıyyesi ve beher kıyyeden ne mikdar arak imal olunacağı tebeyyün ettirildikten sonra berminval-i meşruh rayic-i belde üzere kat’ olunacak fiyâtına göre yüzde on resm-i mirî alınacaktır.

On ikinci bend: Arpa suyundan dahi berminval-i muharrer yüzde on resm-i mirî alınacaktır ve fakat bunların telefatı ziyade olduğundan bermutat yüzde yirmisi tenzil kılınacaktır.

On üçüncü bend: Resm-i mirîsi verilmiş olan müskirattan bir mahalde nam-ı aher ile başka hiç bir gûna resm alınmayacak ve yalnız bir iskeleden sefineye hin-i tahmilinde gümrük nizamına tevfikan resm-i gümrüğü alınacaktır.

On dördüncü bend: Bir mahalden mahal-i ahere müskirat nakl etmek isteyenler nakl edecekleri mikdarın evvel emirde resm-i mirîsini ifa ile tezkeresini almağa mecbur olacaktır ve bir mahalden aher mahalle tezkeresiz müskirat nakl eden olur ise resm-i mirîsi iki kat olarak alınacaktır.

( Hâtime )

Bu kere lağvolunan rüsum-ı müctemianın mukaddema tanzim ve neşr olunmuş olan nizamnamesi işbu nizamnamenin ilanı tarihinden itibaren mensuh’ül-hükm addolunacaktır.
Fi 7 Safer sene 1278

( Zeyl )

Resm-i mirîsi verilmiş olan müskiratın bir mahalden aher mahalle naklinde hasbice nakliye tezkeresi ita olunacak ve hin-i istimarede kitm ve ihfa kılındığı tebeyyün eden müskirattan dahi gümrükden kaçırılan eşyaya tatbikan iki kat resm-i mirî alınacaktır.