717

olunmak üzere az çok müskirat i‘mal iden dükkan ve mağazalardan icare-i seneviyelerinin mecmu‘una nisbetle lazım gelen be‘iye resmi tamamen ahz olunacakdır.

On Üçüncü Madde
Be‘iye resmi müskirat mahallini açup işleten her kim ise sahib-i mülk olsun ve gerek müste’cer bulunsun doğrudan doğruya kendüsünden alınacakdır.

On Dördüncü Madde
Beher sene i‘tası lazım gelen be‘iye resminin nısfı Mart ibtidasında ve nısf-ı aharı dahi Eylül ibtidasında olmak üzere altı aydan altı aya ve zikr olunan tarihlerden bir mah mukaddemce te’diye olunacak ve bunun hilafında hareket edenler işbu nizamnamenin on sekizinci maddesinde muharrer bulunan cezay-ı nakdiye düçar olacaklardır. Müddet-i mu‘ayyene-i te’diye olan altı mah zarfında bir kimse müceddeden müskirat mahalli açacak olduğu halde vereceği resm-i mezkûr altı mahın hitamına kadar olan müddete göre olacakdır. Ber-minval-i muharrer bir senelik be‘iye resminin nısfını verüp tezkiresini almış bulunanlardan resm-i mezkûrun nısf-ı aharını va‘desi hulûlünde te’diye etmeyenleri olur ise derhal dükkan ve mağazaları kapatdırılup vermeleri icab eden meblağı tamamen te’diye edinceye kadar küşadına ruhsat verilmeyecekdir.

Resm-i mezkûrun istihsaliyle verilecek be‘iye tezkirelerinde bunu ahz edecek olan kimsenin ism ve memleket ve tabiyetiyle mağaza veyahud dükkanın bulunduğu mevkii ve mağaza veyahud dükkan-ı mezkûrun mülk sahibi veyahud müste’ceri olup olmadığı ve icare-i seneviyesinin mikdariyle alınan resmin kemmiyeti ve kangı sınıfa dahil olduğu keyfiyetleri tasrih olunarak Zecriye Nezareti mührüyle temhir olunacak ve işbu tezkirenin hükmü yalnız altı mah içün olup her altı mahda bir kere tevarih-i mukarrereden bir mah mukaddem icab eden resmin i‘tasıyla tecdidi lazım gelecekdir.

On Beşinci Madde
Müskirat mahalli açmış olan bir kimse altı mah zarfında ticaretini terk eder veyahud nizamat-ı mevcude hilafında hareketi zuhuruyla mağaza ve dükkanı kapatdırılur veyahud bulunduğu mahalden ahar mahalle nakl-i ticaret edecek olur ise mukaddema vermiş olduğu resmin istirdadına hak