728

( Asâkir-i Zabtiye hakkında nizamnamedir )
( Fasl-ı Evvel )
( Asâkir-i zabtiyenin suret-i tertibi beyanındadır )

Birinci madde: Her vilayetin süvari ve piyade asâkir-i zabtiyesi bir alay itibar olunur.

İkinci madde: Her zabtiye alayı taburlara ve taburlar bölüklere ve bölükler takımlara münkasimdir.

Üçüncü madde: Her tabur lâ-akal iki ve nihayet on bölükden ve her bölük lâ-akal beş ve nihayet on takımdan terekküb eder.

Dördüncü madde: Her süvari takımı dört ve piyade takımı sekiz neferden ve ( kol vekili ) ve ( kol vekili muavini ) namiyle ikişer zabitden ibarettir.

Beşinci madde: Beher süvari bölüğü nihayet altmış ve piyade bölüğü nihayet yüz neferi tecavüz etmemek üzere ( bölük ağası ) ve ( bölük ağası muavini ) ve ( jurnal emini ) unvaniyle üçer zabitin kumanda ve idaresine mufavvazdır.

Altıncı madde: Her sancağın bir tabur asâkir-i zabtiyesi olup kazalara bölük itibariyle taksim olunur. İşbu taburun kumandası bir tabur ağasına ve umur-ı hesabiyesi bir hesap eminine ve umumunun kumandası dahi ( alay beyi ) unvaniyle bir büyük zabite ve muhasebat-ı umumiyesi bir idare eminine muhaveldir. Ve bunların heyet-i mecmuası vali-i vilayetin emr ve nezareti tahtındadır.

Yedinci madde: Her vilayetin alay beyi ve idare emini merkez-i vilayetde bulunup sancaklarda birer tabur ağası ve kazalarda birer bölük ağası bulunur. Ve tabur ağası istihdamına mütehammil olmayan sancaklarda bölük ağası ve bölük ağasının ikametine hacet görülemeyen kazalarda kol vekili bulundurulur. Gerek bölüklerin takımlara ve gerek alayın taburlara suret-i inkısamı ve efradının adedi her vilayet ve liva ve kazanın icab ve ihtiyacına ve üçüncü ve dördüncü maddelerin hükmüne tevfik edilir.

Sekizinci madde: Zabtiye askerliğinin müddeti tamam iki sene olduğundan silk-i zabtiye...