735

ve elbisesi temiz tutmak ve süvari hayvanları nâtüvan veyahut sakat olmamak lâzım olduğundan bunların dâima teftişiyle noksanları var ise tashih ve ikmali birinci derecede bölük zabitlerinin ve onlardan sonra tabur ağalarının ve alay beyinin vezaif-i mahsusasındandır ve bunların icrasında kusur ve noksan vuku bulur ise cümlesi derece derece mesul tutulur.

Yedinci madde: Asâkir-i zabtiyenin bulundukları mevki ve merkezlerde her gün akşam üzeri zabitanı tarafından yoklaması usulü icra ve kendilerine tenbihat-ı lâzıme ifa olunarak mevcuduyla memuriyette bulunan ve hasta olanların miktarını mübeyyin yevmiye bir kıta jurnali bi’t-tanzim ol mevki ve merkezde bulunan mülkiye memuruna ita kılınacaktır.

Sekizinci madde: Asâkir-i zabtiyeye verilen esliha ve elbise lâ-akal ayda bir kere zabitan marifetiyle muayene olunarak esliha ve elbisesini zayi eden ve kayıtsızlıkla telef eyleyen olur ise esmanı maaşından kat’ olunacaktır.

Dokuzuncu madde: Zabtiye askerliğine yazılacak neferatın kefillerinden alınan senetler ve bunların muayenelerini mübeyyin verilecek ilmühaberler ittihaz olunacak defter-i mahsusuna jurnal eminleri marifetiyle bi’l-kayd bölük ağaları nezdinde hıfz olunacaktır.

Onuncu madde: Müceddeden yazılacak neferata tarih-i tahririnden itibaren lâ-akal bir ay kadar kol ve nöbet kaidesiyle usul-i ihzariye ve herkes hakkında olunacak muamele ve hizmet-i saire-i askeriye mümkün mertebe talim ve tarif olunduktan sonra o makule işlerde istihdam olunur ve bunun hilafı olarak mübtedi neferat kullanılacak ve bundan dolayı bir gûne su-i muamele vuku bulacak olur ise zabiti mesul tutulur.

On birinci madde: Asâkir-i zabtiyenin hükümet mahallinde dâima topluca bulunmaları lâzımeden olmakla her birde hükümete mahsus konağın münasip bir mahalli bunlara bi’t-tahsis asâkir-i merkuma orada ikamet ettirilmek ve mevcudun nısfı dâima kolda ve karakollarda ve nısf-ı diğeri hükümet mahallinde bulundurulmak...