757

On dördüncü madde: Açılacak baca büyük olub ve bir kaç aded bulunub da evvel gün kapadılamayarak birazı açık kalacak olur ise gelüb geçenlere bir zarar ve ziyan göstermemek içün açık kalan bacanın yanına sâhibi taraflarından geceleri bir kandil asdırılacakdır.

On beşinci madde: Kaldırımları güzelce sağlamca yapılmaz ise su yolcı ve lağımcı derhâl usûlü üzere Bâb-ı Zabtiye’ye gönderilecekdir.

On altıncı madde: Her nerede olur ise olsun su yolu ve lağım bozulub çirkâb dışaruya cereyân etdiği görüldüğü anda her kimin ise serî‘an def‘-i mazarratı çâresine bakılması husûsu imâm ve muhtârân ma‘rifetiyle sâhibine haber virilerek mazarratı def‘ etdirilecekdir ve kabûl etmeyenler olur ise iki yüz elli dördüncü maddeye tevfîkan kezalik cezâ-yı nakdî ahzıyla mücâzât olunacakdır ve mîrîye ve yâhud evkâfa müte‘allik ise bâ-jurnal Bâb-ı Zabtiye’ye bildirilecekdir.

On yedinci madde: Sokakları çamur edecek ve gelüb geçenlere mazarrat verecek sûretde hiç kimse hâne ve dükkânından ve sâir mahalden sokağa çirkâb ve su dökmeyecekdir ve akıdamayacakdır ve dökenler ve akıdanlar olur ise iki yüz elli dördüncü maddeye kıyâsen kezalik zâbıtadan cezâ-yı nakdî ahzıyla mücâzât olunacakdır.

On sekizinci madde: Açılan ve temizlenen su ve kubur lağımların çamur ve çirkâbı ve her dürlü süprüntü ve hayvânât lâşeleri sokak ortalarında ve mahalle aralarında ve vîrânelerde bırakdırılmayub ve dökdürülmeyecekdir dökenler ve atanlar görüldüğü hâlde dökdüğü ve atdığı şey kendisine kaldırtdırıldıkdan başka o makûleler Kânûn-nâme-i Hümâyûn’un iki yüz elli dördüncü maddesine tevfîkan kezalik zâbıtadan cezâ-yı nakdî ahzıyla mücâzât olunacakdır.

( Yük taşıyan bârgîr hammâllarının ve merkebcilerin sûret-i hareketlerine dâirdir )

On dokuzuncu madde: Bârgîr hammâlları ve merkebciler cum‘a günü umûmen ta‘tîl idüb işlemeyeceklerdir.

Yirminci madde: Yük götürmege muktedir olmayan yaralu ve za‘îf ve sakat hayvânât kullanılmayacaklardır ve tahammülünden ziyâde yükletilmeyeceklerdir.