777

On yedinci madde: Küçük seferlere mahsus olan yelken sefineleri cisr-i cedidden mürur etmek istedikleri halde geldikleri gün karantina pîşgâhında olan şamandıralara rabt olunarak o gecesi cisr-i mezkûrdan geçeceklerdir.

On sekizinci madde: Hınta hamulesi tahliye veyahut tahmil edecek olan sefineler cisrin beyninde ve İstanbul tarafındaki kereste mağazaları önlerinde sahilden üç çeyrek gumena (1) mesafede bağlanılacaktır. (1) Yüz seksen kulaç tul ve imtidad.

On dokuzuncu madde: Hiçbir sefine müddet-i medîde liman derununda ikamet edemeyecektir. Dava ve sekostro veyahut suret-i aharla mevkuf olan sefain-i ticariye İstinye limanına gidip orada ârâm edeceklerdir.

Yirminci madde: Kâffe-i sefain-i ticariye hamule ahz veyahut tahliye etmek veyahut tamir edilmek üzere cisrin beyninde bir mah meccanen ikamet edip müddet-i mezkûrenin inkızasından sonra sefinenin temdid-i ikameti mutlakâ tamiri için sabit olacak lüzuma müstenid bulunacak ve bu lüzum tahakkuk etmedikçe o misillü sefain müddet-i muayyeneden ziyade ikamet ettikleri günlerin her biri için yüz kuruş te'diye ve ifa edeceklerdir. Tamirat-ı mezkûre ikmal olunduktan sonra bu nev' sefineler ya ciserden huruc veyahut harc-ı mezkûru eda edeceklerdir.

Yirmi birinci madde: Her nev' kayık ve mauna ve tulumbaz ve saire cisr-i cedidden duhul etmek üzere İstanbul tarafında ve huruc etmek için Galata tarafında olan gözlerden mürur edecek ve bu nev' merakib-i bahriyenin cisrin beyninde ve gerek cisr-i atik içerisine yelken küşad etmeleri memnu olduğu gibi Tophane ve Sarayburnu hizasından itibaren liman dahilinde yelken ile seyr ü hareketleri dahi memnudur. Bu memnuiyet hilafında hareket edenlerden birinci defada yirmi beş ve ikinci defada elli kuruş ve üçüncü defada bir aded Mecidiye altını cezay-ı nakdî ahz olunduktan sonra kendileri altı gün hapis olunacaktır.