779

Ve bir sefinenin kapudanı ol sefinenin ibtida limana duhûlünde bulunduğu mahalli beyan içün liman idaresine getireceği varakanın idare kaleminde nizamen kaydı icra olunduğunu anlamadıkça avdet etmeyecektir. Pazar günlerinden maada safra odası beher gün alafranga saat dokuzdan dörde kadar açık olacaktır.

Yirmi yedinci madde: Hamulesiz vürud eden sefinelerin derununda bulunan safra başka gemiye ilka olunmayıp safra odasına haber verilecek ve oradan dahi bilâ-tehir mauna gönderilip mezkûr safra ahz olunacaktır. Ve bu yolda canib-i mirîden alınan safra içün fi-i mahsusunun sülüsü ifa olunacaktır.

Yirmi sekizinci madde: Safra nakline mahsus olan maunaların kıçında ve çektikleri suyun mikdarıyla kaç tonilatoluk hamule istiap ettiğine dair dahi baş tarafında bir kırmızı renkte numro ve işaret mevcud olacaktır. Mezkûr nişanlı bulunmayan maunaları kapudanlar kabul etmeyip safra odasına haber vereceklerdir.

Yirmi dokuzuncu madde: Safra ile memlu olan maunanın reisi bir geminin yanına vardıkta safra odasından almış olduğu tezkereyi sefinenin kapudanına teslim edecektir. O dahi tezkere-i mezkûreyi ba'de'l-imza nısfını reis-i merkuma iade edecektir. Matlub mikdar safra sefineye tahmil olunduktan sonra kapudan veyahud koca reis mezkûr tezkereleri bi'l-ahz safra odasına icab eden meblağın ifasıyla liman nezareti tarafından dahi mahsus olarak bir makbuz senedi ita olunacaktır. Ve bunlar mensub olduğu kançılaryadan mürur tezkerelerinin hin-i istihsalinde mezkûr makbuz senedinin iraesine mecbur olacaktır.

Otuzuncu madde: Tedarik olunacak safranın beher tonilatosu içün yüz guruş fiyat vaz' ve tahsis olunmuştur.

Otuz birinci madde: Tüccar kapudanları taraflarından vaki olacak müsted'iyat doğrudan doğruya veyahud kapudanın mensub olduğu devletin kapudan diportu marifetiyle liman nezareti tarafına takdim olunacaktır.