785

( Dersaâdet limanında sefâin-i ticâriye ve sâireden ahz )
( ve istihsâl olunacak şamandıra rüsûmâtına dâir )
( nizâmnâme lâyihasıdır )

Birinci Madde: Beş Osmanlı tonilatoluktan sekiz yüz tonilatoluğa kadar olan bilcümle sefâin-i ticâriyeden bilâ-istisnâ her bir seferde beher tonilatoda sekizer para ve sekiz yüz tonilatodan mütecâviz olan sefâin-i kebîreden sekiz yüz tonilatoya kadar sekizer ve fazlası içün dörder para resm alınacak ve beş tonilatodan aşağı olan sefâin resm-i mezkûrdan muâf olacakdır.

İkinci Madde: Bahr-i Sefîd boğazında vâki Kumkale’den Karadeniz boğazı hâricinde kâin Karaburun ve Şile’ye kadar seyr ve sefer eyleyen ve beş tonilatodan doksan dokuz tonilatoya kadar cesâmetde bulunan körfez kayıklarından beher tonilatoda dörder para resm alınacağı misillü hatab ve kömür gibi eşyâ nakline mahsûs olup doksan dokuz tonilatoyu mütecâviz bulunan gemilerden dahi gerek mesâfe-i mezkûre dâhilinde seyr ve sefer eylesünler ve gerek hâricine çıksınlar beher tonilatoda dörder para resm alınacakdır.

Üçüncü Madde: Boğaziçine ve Kadıkaryesiyle Adalara ve Ayastefanos’a işleyen Şirket-i Hayriye ve Fevâid-i Osmâniye vapurlarının beherinden senede on sekizer ve Haliç Tersane’de işleyen Eyüp vapurlarından dahi dokuzar ve sefâin çekmege mahsûs olan römorkör vapurlarından dahi senede on ikişer Osmanlı lirası ahz olunacakdır.

Dördüncü Madde: Liman idâresi römorkörlerinin edecekleri hizmet meccânen olacak ve şamandıralar mahallerine vaz‘ olunup liman nizâmı icrâ kılındıkça şamandıra resminin istifâsına mübâşeret olunmayacakdır.

Beşinci Madde: İşbu nizâmnâme mevki‘-i icrâya konulduğu günden i‘tibâren üç sene sonra ta‘dîl olunabilecektir.

Fî 6 Cemâziyelevvel sene 1288

fî
99