819

On yedinci bend: Her ne kadar reçete yapılıp verilir ise her reçeteye bir numro vaz‘ ile Umûr-ı Tıbbiye Nezâreti tarafından sah ve imzâ olunarak verilmiş olan bir deftere numrosu numrosuna kayd olunacaktır.

On sekizinci bend: Reçete ile eczacı dükkânından yapılıp verilen ilâcların ağzı mühürlü olup üzerinde falan kimesne içün şöyle isti‘mâl olunacaktır deyu tahrîr olunmuş yaftasıyla verilecektir ve dâhilen isti‘mâl olunacak ilâcların yaftaları beyaz ve hâricen isti‘mâl olunacak ilâcların yaftaları turuncu olacaktır.

On dokuzuncu bend: İspençiyar hiç bir hâlde reçetenin ibâresini tağyîr ve tebdîl ve reçetede muharrer olan eczânın mikdârlarını tezyîd ve tenkîs edemeyecek veyâhûd tahrîr olunmuş bir eczânın yerine dîger bir ecza koyamayacaktır. Reçetede muharrer eczâda sehv ve hatâ olduğuna vâkıf olur veyâ şüphe eder ise reçetede imzâsı bulunan kimesneye mütâla‘âtını iş‘âr edip tahrîren bir cevâb almadıkça reçetenin hâvî olduğu eczâyı terkîb edip vermeyecektir.

Yirminci bend: İspençiyar her bir reçeteyi on yedinci mâddede beyân olunduğu vechle mahsûs numrosuyla deftere kayd ve bu numroyu reçetenin üzerine dahi vaz‘ ettikten sonra reçeteyi sâhibine iâde edecektir.

Yirmi birinci bend: Mekteb-i Tıbbiye-i Şâhâne’de mukayyed tabîb ve cerrâh ve baytarlardan birinin imzâsıyla mümzâ bir reçete olmaksızın hiç kaviyyü’t-te’sîr ve ale’l-husûs semmiyetli edviye vermesi hâssa eczâcılara memnû‘ olduğu misillü eczâcıların reçete yazıp vermeleri ve icrâ-yı tabâbet etmeleri dahi câ’iz olmayacaktır.

Yirmi ikinci bend: Marîz ve hastalardan para tutmak saded ve maksadında ispençiyar ile tabîb beyninde her gûne şirket ve uyuşmak külliyen memnû‘dur.

Yirmi üçüncü bend: Eczacı dükkânından külliyetli eczâ-yı semmiye satılması memnû‘ olup ancak ma‘lûm ve emîn bir kimesnenin neye isti‘mâl edeceğine dâ’ir verdiği memhûr ve mümzâ bir ilmühaber ile satılabilecektir.

Yirmi dördüncü bend: Umûr-ı Tıbbiye Nezâreti tarafından ruhsat verilmeyen edviye-i hafiyenin bey‘ ve fürûhtu memnû‘dur.