823

Te'dîbât-ı muharrerenin icrâsından başka kânûn ve nizâm-ı memlekete tevfîkan îcâb edecek tazmînâtı dahi îfâya mecbûr olacaklardır.

Kırk dördüncü bend: Her bir madde hakkında icrâsı lâzım gelecek işbu mücâzât-ı mütenevvianın tâyin derecesi meclisin reyine muhavvel olacak ve meclis-i mezkûr dahi bu husûsda yine muhâlif-i nizâm olarak zuhûr eden hareketin ehemmiyetini ve mükerrer olup olmadığını ve'l-hâsıl bi'l-cümle esbâb-ı muhaffefe ve müşeddedeyi pîş-i nazar-ı mütâlaaya alacaktır.

Kırk beşinci bend: İspençiyârlık san'atının icrâsına dâir muhâlif-i nizâm her gûne harekât Meclis-i Tıbbiye-i Şâhâne'ye âid olacak ve meclis-i mezkûr dîvân şekline girerek muhâkeme-i maslahatla îcâbı takdîrinde tertîb-i cezâ edecektir.

Kırk altıncı bend: İspençiyâr esnâfı be-her sene üç nefer âzâ intihâb edecek ve bunlar Meclis-i Tıbbiye'de ispençiyârlık san'atının icrâsına dâir vukû bulan müzâkerâtda bulunacaktır ve âzâ-yı mûmâ-ileyhim be-her sene tecdîd olunacaklardır.

( Fasl-ı Sâmin )
( Tetimme-i Nizâmât )

Kırk yedinci bend: Eczâcılık san'atının icrâsından ve edviye bahâsından dolayı zuhûr eden bi'l-cümle münâzaât Meclis-i Tıbbiye'de rü'yet ve muhâkeme olunacaktır.

Kırk sekizinci bend: İşbu nizâmnâme ahkâmına mugâyir olan bi'l-cümle nizâmât-ı sâbıka fesih ve ilgâ olunmuşdur.

Kırk dokuzuncu bend: İşbu nizâmnâmenin icrâsına Mekteb-i Tıbbiye tarafından nezâret ve dikkat olunacaktır ve işbu nizâmnâme şimdiki hâli üzere yalnız Dersaâdet ve tevâbiinde mer'iyyü'l-icrâ olacaktır.

Fî 22 Receb sene 1277