826

( Patentesi olmayan sefâin )

Üçüncü madde — Patentesiz tevârüd eden sefine kapudanı geldiği mahallin temiz olduğunu bir sûret-i âhar ile isbât etmedikçe bulaşık sefâin sınıfından i'tibâr olunur.

( Patenteli sefâin )

Dördüncü madde — Memâlik-i Mahrûse limanlarının birine vâsıl olan sefâin bir emîn mahalde lenger-endâz olduktan sonra fılikalarını paravotoriyaya gönderip kapudanlar patenta ile tâifenin defterini ba'de'l-ibrâz sefâin-i merkûmenin kapudanları istintâk olunup râkib oldukları sefinelerinin ahvâl-i hâzıralarını ve esnâ-yı râhdâ uğradıkları mahalleri ve ihtilât ettikleri sefine ve kayıkları doğruca i'lân edeceklerdir eğerçi patentaları temiz ise der-akab pratikası verilip meşkûk yâhud bulaşık olur ise tahaffuzhâne tarafından verilen gardiyanı kapudanlar kabûl etmeye mecbûrdurlar ve sefâin-i mezkûre hakkında işbu nizâmnâmenin ikinci maddesinde i'lân olunan usûl cârî olmak gerektir.

( Defter hakkında )

Beşinci madde — Beyândan müstağnî olduğu vechle bir sefine meşkûk yâhud bulaşık olup hamûlesini tekmîlen ihrâc ve pratika almak istediği vakit ancak sefine-i mezkûre kapudanı hamûlesini ihrâc edecek mahalde bulunan karantina me'mûruna hâmil olduğu emti'anın defterini ibrâz etmeye mecbûrdur ve bu sûret olmadıkça ya'ni sefine meşkûk ve bulaşık olmaz veyâhud meşkûk ve bulaşık olup da tekmîl hamûlesini çıkarmaz ise ve tekmîl çıkarıp pratika almaz ise karantina me'mûrları kapudanların defterlerini talep etmeye muktedir olamayalar.

Altıncı madde — Meşkûk yâhud bulaşık patenta ile vürûd eden hamûleli sefâin

Birinci bend — Gerek meşkûk ve gerek bulaşık hamûleli sefâinin müddet-i karantinaları tahaffuzhâne önüne lenger-endâz olacakları günden i'tibâr olunup sefine-i merkûme hamûlesini ihrâcdan on gün sonra pratika alacağına binâen işbu nizâmnâmenin ikinci maddesinde ta'yîn olunduğu üzere müddet-i karantinalarının

hitâmından