834

( Yirminci Madde Yolcular Hakkında )

Birinci Bend: Meşkûk yâhud bulaşık tezkereler ile tevârüd eden sefâinin yolcuları tahaffuzhanede karantinalarını çıkara ve derûn-ı sefinede ancak kapudanın intihâb etdiği üç nefer yolcuya müsaade olunub sefine ile karantinasının tathîrini icra edeler ve üç neferden ziyade olmasına ruhsat verilmeye ve tahaffuzhanede karantinalarını çıkaracak yolcular sefine-i mezkûrenin filikasıyla tahaffuzhaneye azîmet ve müddet-i karantinalarını tahaffuzhane-i mezkûre vaz'-ı kadem etdikleri günden i'tibâr olunarak bulaşık patente ile tevârüd eden sefinenin yolcularının karantinası on beş gün meşkûk patente ile gelenlerin on güne bâliğ olacakdır.

İkinci Bend: Bulaşık yâhud meşkûk tehî sefâin ile Akdeniz cânibinden tevârüd eden yolcular altı neferden mütecâviz olmaz ise gardiyan tarafından kendilere ta'rîf olunan usûl üzere karantinasına rağbet birle işbu nizamnamenin onuncu maddesinde mestûr üçüncü bend mûcibince sefâin-i mezkûre hakkında ta'yîn olunan teshilâtdan hissedâr olalar.

Üçüncü Bend: Beyândan müstağnîdir ki zikr olunan adedi mütecâviz yolcuları hâmil olan tehi sefine humûleli sefâin sınıfına idhâl olunacakdır fakat bulaşık taraflardan mütevârid olan yolcular ispolyo'ya me'zûn olub buna dâir olan ta'limatda mestûr olan usûllere imtisâl ile bu maddeye münhasır olan teshilâta nâil olalar.

Dördüncü Bend: Gerek vapur sefâini ve gerek sefâin-i sâireye râkib olan bi'l-cümle yolcular yedinde azîmet etdikleri mahallin sıhhiye me'mûrları tarafından yâ mücedded sıhhiye tezkeresi i'tâ yâhud bu misillü tezkereyi imza etmelidir ve beher sefine kapudanı hîn-i vusûlünde sefinesinin patentesiyle beraber sıhhiye tezkerelerini karantina me'mûrlarına ibraz edecekdir ve eğerçi tezkere-i mezkûreden birisi meşkûk ve yâhud bulaşık olur ise sefine-i mezkûre bu hilâf-ı hareketden nâşî cezâya şâyân ola.

Beşinci Bend: Bir mahalden bilâ-tezkere vürûd eden yolcu olur ise geldiği...