842

On sekizinci madde: Emtia yâhûd eşyâ-yı sâirenin tathîrine ta’yîn olunan kimseler tathîr etdikleri emtiadan sonra gelen eşyayı taşımayıp eşyâ-yı mezkûre ile hîç bir nev’ ihtilât dahi etmeyecekleri.

On dokuzuncu madde: Karantina me’mûru ve tabîbi tahaffuzhânede bulunan kâffe-i emtiaya hîç bir dürlü zarar gelmemesine dikkat edecekleri ve emtia-i mezkûreye esnâ-yı tathîrde nezâret edecekleri.

Yirminci madde: Meşkûk patente yâhûd tezkere-i sahîha ile tevârüd eden eşyâ bulaşık patente yâhûd tezkere-i sahîha ile gelen emtia ile karışık konulmayacağı.

Yirmi birinci madde: Emtianın tahaffuzhâne mahzenlerine vaz’ olunduğu günden zîrde beyân olunan usûl mûcibince tekmîlen tathîr olunmasına dikkat edecekleri.

Yirmi ikinci madde: Bu ta’lîmâtın nihâyetine ilâve olunan defterin sınıf-ı evvelinde zikr olunan bulaşık kabûl eden eşyânın havalandırılarak tathîr olunacağı.

Yirmi üçüncü madde: Denkler bir taraftan sökülüp tathîrine ta’yîn olunan gardiyan yâhûd hammallar derûn-ı denkde bulunan emtiayı müddet-i karantinalarının nısfına değin karıştırıp ba’dehu nısf-ı âhirinde dahi yine bu usûl mûcibince tathîr olunmak üzere açdığı tarafın karşı tarafından dahi söküleceği.

Yirmi dördüncü madde: Yapağının hararları açılıp müddet-i karantinalarında sıkça karıştırılacağı şöyle ki üstündeki alta ve altdaki üstüne çıkacağı.

Yirmi beşinci madde: Sandık ve varil ve bu misillü nesnelerin derûnunda bulunan eşyâ ba’de’l-ihrâc îcâbına göre tathîr olunacağı.

Yirmi altıncı madde: Yapışkan meyveler vaz’ olunan sandık ve sepet ve zembil ve varillerden ihrâc olunmayıp ve derûnlarında bulaşık kabûl eden nesne bulunduğu takdîrce cümlesi tefrîk olundukda müddet-i karantinalarının nısfında pratikaya verileceği.

Yirmi yedinci madde: Tuzlu kök ve aslında nemli olup esnâ-yı râhda kurumuş kökler.