867

Yedinci bend: Bir sefînenin temiz tezkeresi olarak esnâ-yı râhda tâife ve yolcularından bir veyâhûd bir kaç kişi vefât eyledikde me’mûr-ı merkûmun maiyyetine taraf-ı Devlet-i Aliyye’den ta’yîn olunan tabîb gelüb derûn-ı sefînede mevcûd olan tâife ve yolcuların sıhhat ve âfiyetde bulunduklarını tahkîk eyledikce pratika verileceğinden sefîne hakkında usûl-i mezkûre icrâ olununcaya kadar karantina olunub aslâ kara ile ihtilât eylemeyeceği ve sefîne-i mezkûre kapudanı tarafından her ne kadar iskât etmege gayret olunur ise de me’mûrîn-i merkûmenin istimâ’ ve kabûl eyleyecekleri ve kabûl eyledikleri takdîrde işbu nizâmnâme-i sıhhiyede münderic olan kâffe-i husûsâtın mugâyirinde bulunduğu hâlde azl olunacağı

Sekizinci bend: Tezkere-i sıhhiyesi olmayan sefâyin bulaşık mahalden vürûd eylemiş misillü i’tibâr olunacağından Devlet-i Aliyye tarafından tahaffuz müdîri ve tabîbi ta’yîn olunan ve tahaffuzhâne bulunan bir mahalde karantinasını tekmîl çıkardıkdan sonra pratika verileceği

Dokuzuncu bend: Devlet-i Aliyye liman ve iskelelerinden olarak bir sefîne hareket eylediği mahalden tezkere-i sıhhiyesine tahaffuz me’mûrları tarafından şerh verilmemiş olacağı sûretde bulaşık add olunacak olduğundan sekizinci bendde beyân olunan usûl-i tahaffuziye haklarında icrâ olunacağı

Onuncu bend: Bir sefîne terk eylediği mahalde vebâ illeti bulunarak illet-i mezkûre inkıtâından hareket eylediği güne kadar otuz gün mürûr etmemiş olduğu sûretde meşkûk add olunacağından sefîne-i mezbûre hakkında işbu kânûnnâmenin üçüncü ve dördüncü ve sekizinci ve dokuzuncu bendlerinde beyân olunan tertîbât-ı tahaffuziyenin icrâ olunacağı

On birinci bend: Me’mûrîn-i merkûme kâmil ve herkesin hizmetini icrâ eylemekde hevesli olub aslâ bir kimesneye bed-söz söylememeleri ve tahkîr eylememeleri lâzimeden olduğundan bu misillü bir hareketde bulunduklarında ziyâde tekdîr olunacaklarından mâadâ îcâb eylediği sûretde cünhasına göre hizmetden ihrâc olunacağı

On ikinci bend: Me’mûrîn-i merkûme her kangı müdîrin maiyyetinde bulunur ise