873

Beşinci bend: Bir nevi‘ hastalığa dûçâr olan yolcu tahaffuzhâne tabîbinin tahrîren rızâsını tahsîl eylemedikçe aspoliyo etmeyecekleri.

Altıncı bend: Mezkûr aspoliyo lâyıkı üzere icrâ olunmak içün tahaffuzhânelerde bir âdem yıkanacak kadar ağaçdan veyâhûd bakırdan masnû‘ fıçı gibi üç aded mağsel tedârik olunmalı. [oluna]

Yedinci bend: Yıkanmakda isti‘mâl olunan suyun pâk ve berrâk olması ve ile sayfda soğuk ve vakt-i şitâda ılıcak yâhûd soğuk olması yıkanan kimesnenin re’yine ihâle olunmuş olduğu.

Sekizinci bend: Bir yolcunun yıkandığı su dökülüp dîğer yolcunun ol suda yıkanması ve iki nefer yolcunun birlikde yıkanmaları dahi memnû‘ olduğu.

Dokuzuncu bend: Tahaffuzhânede kâ’in olan odalardan bir adedi tathîrât-ı mezkûreye tahsîs olunup yıkanan kimesneler zükûrdan oldukları hâlde tahaffuz me’mûrânından bir neferinin oda-yı mezkûrede hâzır bulunması ve inâsdan olduğu sûretde bir tâ’ifeden i‘timâd olunacak bir nefer nisânın hâzır bulunacağı.

Onuncu bend: Suda yıkanan kimesneler suya girdikleri ânda üzerlerinde bulunan libâsını havzdan haylice uzakda bırakıp oradan suya girecekleri ve nigehbân der-akab esvâb-ı mezkûreyi alıp tathîr olunmaları zımnında tahsîs olunan mahalle gönderecekleri ve mezkûrların sudan hurûclarında şehirden getirilen libâsları giymeleriçün i‘tâ edecekleri.

On birinci bend: Aspoliyo eden yolcuların esvâbı cinslerine nazaran mezkûrların diledikleri vech üzere tathîr olunacağı ya‘nî suya vaz‘ yâhûd tütsüye arz olunarak tathîr olunmaları ve ba‘de’t-tathîr husûs-ı mezkûr zımnında iktizâ eden müddet mürûr etdikde elbise-i mezkûre ashâbına teslîm olunacağı.

On ikinci bend: Kükürt ve güherçile bir rub‘ ve kepek nısf olarak tütsü ile tütsülenecek eşyâlar altı sâ‘at bir düziye tütsü ile tathîr olunacağı ve suya vaz‘ olunarak tathîr olunacak eşyâların kırk sekiz sâ‘at suda duracakları.

fî 11