945

Meclis-i umumide aherleri aza intihab olunur ve bu intihab vuku buluncaya değin meclis-i mezkûrda tekmîlen azay-ı meclisin ekseriyeti aranılır.

Yirmi Sekizinci Madde
Meclis-i Ruhaninin vezaifi milletin umur-ı ruhaniyesine nezaret ve itikadat-ı mezhebiyeyi milletçe tervic ve tahkim ve Ermeni kilisasının akaid ve rivayat-ı meriyesini ihlalden muhafaza ve kilisalar ile ehl-i kilisanın bir hal-i muntazamda bulunmalarına sarf-ı dikkat ve taife-i ruhbanın gerek ahval-i hazıralarının ıslahına ve gerek ahval-i müstakbelelerinin istihsal-i esbab-ı teminiyesine devam ve ikdam ve mekatib-i milliyeyi vakit vakit muayene ile talim-i mezheb hususuna bezl-i dikkat eylemek ve ehliyet ve kabiliyetle muttasıf rahip ve papaslar yetiştirmek ve milletçe tekevvün eden mesail-i mezhebiyeyi bittehkik usul-i meriye-i kilisaye tatbikan hall ve tesviye etmek hususlarından ibarettir.

Yirmi Dokuzuncu Madde
Meclis-i Ruhani sırf diyanete müteallik zuhur eden bir mesele-i mühimmeyi hall edemediği takdirde Dersaadet’de bulunan piskoposlar ve kilisa vaiz ve baş papaslarıyla ikincilerini ve iktiza ettiği halde Dersaadet kurbünde vaki sancaklarda mukim murahhasları celb ve davet ile Meclis-i Umumi-i Ruhani teşkil eder ve bu meclis dahi mesele-i mezkûrenin hallini daire-i iktidarı haricinde addettiği halde bir mümza mazbata ile Umumi Katoğikos tarafına müracaat olunur.

Otuzuncu Madde
Meclis-i Ruhaninin her nevi mazbataları daima azay-ı meclisin ekserisinin imzasıyla mümza olacaktır.

Otuz Birinci Madde
Gerek Dersaadet ve gerek taşralara vaiz tayini için iktiza eden ruhsat meclis-i mezkûr tarafından ita olunur ve papas maddesine Dersaadet için ise kezalik meclis-i mezkûrdan ve taşralarda kangı mahal için ise o mahallin ruhani meclisi tarafından ruhsat verilir.

Otuz İkinci Madde
Bir kilisa cemiyeti ile papasları müceddeden papas tayinine lüzum görür de Meclis-i Ruhaniden bir kıta mümza mazbata ile istida etmedikçe ol babda ruhsat verilmez.

119