961

Bir kalem olup murahhasalık dâhilinde bulunan kilisa cemâatleri nüfûs defterlerini cem‘ ile tahrîr-i nüfûs edecekdir.

Doksan yedinci madde — Murahhasa intihâbı lâzım geldikde Patrik intihâbına kıyâsen murahhasalık dâhilindeki meclis-i umûmîde bi’l-intihâb mazbatası mahallî meclis-i muhteliti vâsıtasıyla Patrike takdîm olunup o dahi Dersaâdet Meclis-i Muhtelitinin muvâfakati ile ol vechile intihâb olunan zâtı murahhasa ta‘yîn ederek Bâb-ı Âlî’ye arz ile evâmir-i resmiyesini istihsâl eder.

Doksan sekizinci madde — Ber minvâl-i sâbık murahhasalıklarda bulunan meclisler Dersaâdet meclislerinin esâsı üzere teşkîl olunup ve vazîfeleri dahi o minvâl üzere olup fakat mezkûr taşra meclisleri a‘zâsının mahal ve mevki‘lerinin mikdâr-ı nüfûsuna göre yalnız bir def‘a ta‘yîn olunacaklardır ve nizâmen iâne-i milliye te’sîs olununcaya değin taşralarda ber minvâl-i sâbık akd olunacak meclis-i umûmî a‘zâsını intihâba hakkı olanlar birinci ve ikinci ve üçüncü mertebede devlete vergü virenlerden ibâret olacakdır ve bu meclislerin sûret-i teşkîli Patrik-hâne tarafından murahhasalar ile bi’l-istişâre dâirelerinin mikdâr-ı nüfûsuna göre kararlaşdırılacakdır.

( Hâtime )

Doksan dokuzuncu madde — İşbu nizâmnâmenin esâsına dokunulmaksızın ba‘zı teferruâtının bi’t-tecrübe ta‘dîline lüzûm göründüğü takdîrce târîh-i te’sîsinden beş sene sonra meclis-i umûmîde rûhânî ve cismânî meclisleri a‘zâsından üçer ve sâlifü’z-zikr dört komisyonlardan ikişer ve bunlardan mâadâ meclis-i umûmî a‘zâsından veyâhud hâricden olarak dîğer altı kimesneler ki cem‘an yirmi a‘zâ intihâbıyla bir komisyon teşkîl olunarak lüzûmu görünen ta‘dîlât bu komisyonda kararlaşdırılıp meclis-i umûmîde tasdîk olundukdan sonra Bâb-ı Âlî’den lede’l-isti’zân sâdır olacak irâde-i seniye üzere îcâbı icrâ kılınacakdır.

121