981

Ahkâmı bin iki yüz seksen dokuz senesi Rumi Mart ibtidasından itibaren tadil olunabilecektir.

On beşinci madde: Dahil ve hariçde Banka Devlet-i Aliye’nin resmi ve muayyen umur-ı sarrafiyesi memuru bulunacaktır ve meskukat-ı mağşuşenin tedavülden kaldırılması hususunun kâffe-i icraatına mezkur banka memur olacaktır. Devlet-i Aliye bu babda iktiza eden tedabirin ittihazına banka ile bil-müzakere karar verecektir.

On altıncı madde: Mikdar ve şeraiti bir mukavelename-i mahsusa ile tayin olunmak üzere Banka Devlet-i Aliye’ye bir kredi küşad edecektir ve şube ve acenteleri bulunan kaza ve mahallerde varidat-ı devleti tahsil etmek selahiyeti münhasıran bankaya aid olduğundan işbu kredi mezkur şube ve acentelerin bulunacağı kaza ve mahallerde tahsil olunmak üzere varidat-ı muayyene tahsisiyle temin olunacaktır.

On yedinci madde: Devlet-i Aliye banka muamelatının icrasına uygun bir bina inşa etmesi için lazım olan arsayı meccanen ita buyuracak ve müddet-i imtiyaziyenin inkızasından sonra mezkur binanın masarif-i inşaiyesini bankaya tediye ederek mezkur arsa ve binayı gerü tasarrufuna alacaktır ve bankanın şubeler yapacağı mahallerde lazım olan arsaların iştirasını mümkün mertebe teshil buyuracağı misillü bankanın başlıca merkeziyle şubelerinin husul-i emniyeti için labüd olan himaye-i askeriyeyi diriğ etmeyecektir.

On sekizinci madde: Banka şubeleriyle hisse ve tahvilat ve havalat ve bank-post-bil yani havale mektubu ve çek yani sandık pusulası ve nahvileri her dürlü rusumat ve vergiden kâmilen muaf olacaktır. Mezkur banka evrak-ı sahiha üzerine yazılmış olmadıkça Memalik-i Mahruse’de tedavül edecek hiç bir poliçe ve evrak-ı saireyi kabul etmeyecektir.

On dokuzuncu madde: Mezkur banka Dersaadet’de bulunan Türkçe ve Fransızca gazetelerin biri veyahut bir kaçı vasıtasıyla her mah muamelatının defterini tab' ve neşr edecektir. Temettüat-ı vakıasının hissedaran cemiyet-i umumiyesi tarafından ilan olunabilmesi için mezkur bankanın on iki mahda bir kere muhasebatının...