101

Masrafını verinceye dek anı tahtânîde tasarrufdan men‘ eder.

1316 Madde
İki komşu beynindeki hâit-i müşterek üzerinde tarafeynin köşk
ve kiriş uçları gibi hamûleleri olduğu hâlde hâit münhedim olub da birinin
imtinâ‘ı üzerine diğeri binâ eylese müşâriki masrafının nısfını te’diye edinceye dek
anı ol hâit üzerine hamûle vaz‘ından men‘ eder.

1317 Madde
İki hâne beynindeki duvar münhedim olub da birinden diğerinin
makarr-ı nisvân olan mahalli görünür olduğu cihetle birinin sâhibi müştereken
duvarı binâ etmek istediği hâlde diğerinin sâhibi imtinâ‘ eylese binâya
cebr olunmaz.
Fakat tahtadan yâhud sâir nesneden bi’l-iştirâk beynlerinde bir sütre ittihâz etmeleri
içün hâkim tarafından cebr olunur.

1318 Madde
İki komşu beyninde müşterek olan duvara vehen gelüb de
sukûtundan havf olunmağla biri nakzını istediği hâlde diğeri imtinâ‘ etse
bi’l-iştirâk nakz ve hedm etmek üzere cebr olunur.

1319 Madde
İki sağîr yâhud iki vakıf beyninde müşterek olan bir akâr
ta‘mîre muhtâc olub da hâli üzere ibkâsı muzır olduğu hâlde iki vasîden
yâhud iki mütevelliden biri ta‘mîr etmek isteyüb de diğeri imtinâ‘ eylese ta‘mîre
cebr olunur.
Meselâ iki sağîrin hâneleri beyninde bir müşterek duvar olub da sukûtundan havf
olunarak birinin vasîsi ta‘mîr etmek istediği hâlde diğerinin vasîsi
ibâ eylese cânib-i hâkimden bir emîn âdem irsâl ile nazar olunur.
Fi’l-vâki‘ duvarın hâli üzere terki takdîrinde sağîrler hakkında zarar olacağı
ma‘lûm olursa ibâ eden vasî diğer vasî ile müştereken mâl-ı sağîrden ol
duvarı ta‘mîr etmek üzere cebr olunur.
Kezâlik iki vakıf beyninde müşterek olan bir hâne ta‘mîre muhtâc olub da mütevellilerden
biri ta‘mîr etmek istediği hâlde diğeri imtinâ‘ eylese mâl-ı vakıfdan ta‘mîr
etmek üzere hâkim tarafından cebr olunur.

1320 Madde
İki kişi beyninde müşterek bir hayvân olub da birisi anı
beslemekden ibâ etmekle diğeri hâkime mürâcaat etse hâkim ibâ eden hissedâra