139

Nitekim bir medyun malını rehn edip de hîn-i akd-i rehinde yâhud soñradan deyniñ va‘desi hulûlünde rehni satmak üzere birini tevkîl etdiği sûretde mürtehiniñ rızâsı olmadıkça müvekkil-i râhin o vekîli azl edemez. Kezâlik müddeîniñ talebi üzerine müddeâ-aleyh birini husûmete tevkîl etdikde müddeîniñ gıyâbında anı azl edemez.

1522 Mâdde – Vekîl kendini vekâletden azl edebilir. Fakat ber-vech-i bâlâ gayrıñ hakkı ta‘alluk etmiş ise azl edemeyip îfâ-yı vekâlete mecbûr olur.

1523 Mâdde – Müvekkil vekîlini azl etdikde vekîle haber-i azli vâsıl oluncaya dek vekâleti üzerinde kalır ve o vakte kadar tasarrufu sahîh olur.

1524 Mâdde – Vekîl kendisini azl etdikde azlini müvekkile bildirmesi lâzım gelir. Ve azli müvekkiliñ ma‘lûmu oluncaya dek vekâlet kendi uhdesinde kalır.

1525 Mâdde – Medyûnuñ gıyâbında kabz-ı deyne vekîl olan kimseyi müvekkili azl edebilir. Amâ dâin anı medyûnuñ huzûrunda tevkîl etmiş ise medyûnuñ ilmi lâhik olmadıkça azli sahîh olmaz. Bu sûretde medyun anıñ azlini öğrenmeden aña deynini i‘tâ etse deyinden berî olur.

1526 Mâdde – Müvekkilün-bihiñ hitâmıyla vekâlet nihâyet bulur. Vekîl dahi bi’t-tab‘ vekâletden mün‘azil olur.

1527 Mâdde – Müvekkiliñ vefâtıyla vekîl mün‘azil olur. Fakat gayrıñ hakkı ta‘alluk etmiş ise mün‘azil olmaz (760)ıncı mâddeye bak.

1528 Mâdde – Müvekkiliñ vefâtıyla vekîliñ vekîli dahi mün‘azil olur (1466)ncı mâddeye bak.

1529 Mâdde – Vekâlet mevrûs olmaz. Ya‘nî vekîl fevt oldukda vekâletiñ hükmü kalmaz ve bu cihetle vekîliñ vârisi anıñ makâmına kâim olmaz.

1530 Mâdde – Müvekkiliñ yâhud vekîliñ tecennün etmesiyle vekâlet bâtıl olur.

İrâde-i Seniyye târîhi fî 20 Câ sene 91