141

Binaenaleyh mecnun ve ma’tuh ile sabiyy-i gayr-i mümeyyizin sulhu asla sahih olmaz ve sabiyy-i me’zunun sulhunda zarar-ı beyyin yok ise sahih olur. Şöyle ki bir kimse sabiyy-i me’zundan bir şey da’va edip de o dahi ikrar eylediği surette an ikrar sulhu sahih olur. Ve sabiyy-i me’zun alacağını imhal ve te’cil etmek üzere akd-i sulh edebilir. Ve alacağının bir mikdarı üzerine sulh oldukda eğer beyyinesi var ise sulhu sahih olmaz. Ve eğer beyyinesi olmayıp da hasmının yemin edeceği dahi ma’lum olur ise sulhu sahih olur. Ve ahar kimseden bir mal da’va edip de mikdar-ı kıymeti üzerine sulh olsa sahih olur. Fakat ol malın kıymetinden noksan-ı fahiş üzerine sulh olsa sahih olmaz.

1540 Madde — Bir sabinin da’vasından velisi sulh oldukda eğer sabiye zarar-ı beyyin yok ise sahih olur. Ve eğer zarar-ı beyyin var ise sahih olmaz. Binaenaleyh bir kimse bir sabiden şu kadar guruş da’va edip de sabinin parasından vermek üzere pederi sulh oldukda eğer müddeinin beyyinesi var ise sulh sahih olur. Ve eğer müddeinin beyyinesi yok ise sulh sahih olmaz. Ve sabinin ahar kimsene zimmetinde alacağı olup da pederi anın bir mikdarını hatt ve tenzil ile sulh oldukda eğer beyyinesi var ise sahih olmaz. Ve eğer beyyinesi olmayıp da hasmının yemin edeceği dahi ma’lum olur ise ol halde sulh sahih olur ve sabinin alacağı kıymetinde bir mal üzerine velisi sulh olsa sahih olur. Fakat gabn-ı fahiş bulunur ise sulhu sahih olmaz.

1541 Madde — Ale’l-ıtlak sabi ile mecnun ve ma’tuhun ibrası sahih olmaz.

1542 Madde — Husumete vekalet sulha vekaleti müstelzim olmaz. Binaenaleyh bir kimse ahar kimsneyi da’vasına vekil edip de o dahi bila-izin ol da’vadan sulh olsa sahih olmaz.

1543 Madde — Bir kimse kendi da’vasından sulh olmak üzere diğerini tevkil edip de o dahi bi’l-vekale sulh oldukda musalah-un-aleyh müvekkil üzerine lazım gelir. Vekil anınla muahez ve mutaleb olmaz.