142

Meğer ki vekil musalehun aleyhe zâmın ola ol halde vekil kefaleti hasebiyle muaheze olunur.
Ve bir de vekil an ikrar bir maldan mal üzerine sulh olub da sulhu nefsine muzaf kılar ise ol vakit vekil muaheze olunur yani bedel-i sulh andan alınır o dahi müvekkiline rücu eyler.
Mesela vekil bi'l-vekale şu kadar guruş üzerine sulh oldukda ol meblağı müvekkilin vermesi lazım gelir vekil andan mes'ul olmaz.
Fakat sen şu kadar guruş üzerine sulh ol ben kefilim demiş ise o halde bu akçe vekilden alınır o dahi müvekkiline rücu eyler ve bir de an ikrar maldan mal üzerine sulh vaki olub da vekil sen falanın davasından bimeblağ sulh ol diyerek akd-i sulh etmiş ise bey' hükmünde olduğu cihetle bu suretde dahi bedel-i sulh vekilden alınır o dahi müvekkiline rücu eder.

1544 Madde İki kişi beyninde olan davadan ahar bir kimesne fuzuli olarak yani bila emir sulh oldukda eğer bedel-i sulha zâmın olur ise yahud benim falan malım üzerine deyu bedel-i sulhu kendi malına muzaf kılar ise veyahud şu meblağ yahud şu saat üzerine deyu meydanda olan nukuda ya uruza işaret eder ise yahud zâmın olmayub ve kendi malına izafe ya işaret dahi etmeyüb de ale'l-itlak şu kadar guruş üzerine sulh oldum der ve ol mikdar meblağı teslim eder ise işbu dört suretde dahi sulh sahih ve ol kimesne müteberri olur.
Ve eğer dördüncü suretde bedel-i sulhu teslim etmez ise müdde-i aleyhin icazetine mevkuf olub eğer muciz olur ise sulh sahih ve bedel-i sulh müdde-i aleyh üzerine lazım olur ve eğer muciz olmaz ise sulh batıl olur ve dava hali üzere kalır.

Bab-ı Sani

(Musalehun aleyh ile musalehun anhın ba'zı ahval ve şurûtu beyanındadır)

1545 Madde Musalehun aleyh eğer ayn ise mebi' hükmünde ve eğer deyn ise semen hükmünde olur.

(Binâ')