158

Hukuka mani‘ göründüğüne ve saye-i adalet-vaye-i Hazret-i Padişahide erbab-ı mesalihin mazhar-ı teshilat olmaları matlub ve mültezim bulunduğuna binaen ba‘d-ezin arazi memurlarının arazi de‘avisi içün bir saatden zaid mesafeye azimetlerinde mahkeme memurlarının aldıkları harcın sülüsü mikdar ücret ahz etmeleri hadd-i i‘tidalde olmasiyle ol vechle icra-yı iktizası Şura-yı Devlet karariyle ta‘mimen vilayata ve suret-i mahsusada idare olunan mutasarrıflıklar ile Nezaret-i müşarün-ileyhaye tavsiye ve iş‘ar kılınmış olmağın oraca da suret-i meşruha vechle ifa-yı mu‘ameleye himmet olunması lazım geleceği beyaniyle şukka.

Fi 27 Muharrem sene 93

( Ceza Kanunname-i Hümayununun Yüz Altmış )
( Dördüncü Maddesi ) [1]

Haric-i şehir ve kasaba ve kurada insana mahsus yahud kabil-i sükna ve isti‘mal olmayan binalara ve sefinelere ve koru ve orman ve henüz toprak üzerinde bulunan mahsulat-ı kendi malı olmadığı halde amden ateş koyup ihrak eden kimse müebbeden veyahud on beş seneden akall olmamak üzere muvakkaten ve kendi malı olup da kezalik amden ihrak etmesinden harikin sirayetiyle ahare mazarratı dokunduğu halde dahi muvakkaten kürek cezasına müstahak olur.

Fi Gurre-i Ramazan sene 91

( Kanunname-i Mezkûrun Yüz Yetmiş Yedinci Maddesine )
( Zeyl Olunan Fıkradır ) [2]

Katl kasdiyle olmaksızın ika‘ edilen darbden müteessiren madrub vefat eder ise fa‘ili beş seneden akall olmamak üzere muvakkaten küreğe konulacaktır.

Fi 27 Rebiülahir sene 1292 ve fi 21 Mayıs sene 1291

( Kanunname-i Mezkûrun İki Yüz On Yedinci Maddesi ) [3]

Zirde muharrer beş halin cümlesi beraber olarak icra olunan sirkatın cezası

---
[1] Mezkûr madde birinci cildin beş yüz yetmiş üçüncü sahifesinde mündericdir.
[2] Mezkûr madde birinci cildin beş yüz yetmiş beşinci sahifesinde mündericdir.
[3] Mezkûr madde birinci cildin beş yüz seksen dördüncü sahifesinde mündericdir.

( Müebbeden )