173

( Divan-ı Temyizler rüesa ve azalarına verilen talimat-ı seniyyedir )

Birinci madde Bu defa şeref-sadır olan ferman-ı adalet ahkam-ı münifesinden olduğu vechile vilayetlerde bulunan Divan-ı Temyizlerin riyasetlerine Meclis-i Temyiz riyasetlerinden munfasıl merkez-i vilayet naipleri memur olacaklardır.

İkinci madde Liva ve kazalar mehakim-i şer'iyesinden verilen ilamâtın tetkikat-ı şer'iyesi dahi merkez naiplerinin şer'-i şerife ait vazifelerine ilaveten taraf-ı meşihat-penahiden kendilerine muhavel olacaktır.

Üçüncü madde Divan-ı Temyizler hukuk-ı adiye ve muhakemat-ı cezaiyeye müteallik nizamen rüyet olunan deavinin tetkikine memur olup bunların vezaifini nizamat-ı mevzua ile muayyen olduğu gibi ahali taraflarından müntehab ve mansub azası dahi bulunduğundan naipler vazife-i şer'iyelerini başkaca ifa etmek üzere işbu divanlarda münhasıran kanun ve nizam hükmüyle riyaset edeceklerdir.

Dördüncü madde Divan-ı Temyizler liva ve kazalarda bulunan mehakim-i nizamiyede rüyet ve hükm olunan hukuk-ı adiye ve muhakemat-ı cezaiyeden kendilerine havale olunacak ve derece-i saniyede nizamen rüyeti istida kılınacak deaviyi kanun ve nizama tevfikan tetkik eyleyeceklerinden bu misillü deavinin tetkikat ve müzakeratı divanların aza-yı müntehabesinin ekseriyet veya ittihad-ı arasıyla cereyan edecektir.

Beşinci madde Muhakemat-ı cezaiyenin Divan-ı Temyizlere ait olan tetkikatında ve hususan ef'al-i müsbetenin ahkam-ı kanuniye ile tatbikatında begayet iltizam-ı istikamet ve dikkat kılınması ehem olup bir adamın bila-hükm mahbusta kalmasını veyahut kanunen müstahak olacağı dereceden ziyade ceza görmesini mucib bir hükm sudurunda divanların rüesa ve azası heyetçe mesuliyet-i kanuniye altına alınmak mukarrerdir. Liva Meclis-i Temyizleri talimatı başkaca tanzim olunacaktır.

Fi 28 Zilkade sene 1293 | Ve fi 15 Kanun-ı Evvel sene 1291