197

İçün tarafeynin muhakemesiyle Divan-ı İstinaf-ı Ticaret’den verilen ilâmın
nakzında ihtilaf-ı ara vaki olduğundan mehakim-i nizamiyede vekilin teklifi asilin
teklifi hükmünde olup olmayacağının ve kable’t-tahlif vekil buna dair olan
teklifinden nükûl eder ise asilin davadan sukûtu lâzım gelip gelmeyeceğinin
lüzum-ı tayini mutazammın Divan-ı Ahkam-ı Adliye Temyiz Mahkemesi’nin Hukuk Dairesi’nden
tanzim kılınan müzekkere üzerine Şûrâ-yı Devlet Tanzimat Dairesi’nden tanzim
ve Encümen-i Has-ı Vükelâ’da kıraat olunan tezkerenin suret-i muhrecesi leffen
tesyer kılındı. Mealinden müsteban olacağı veçhile tahlif bir mesuliyet-i
maneviye olup yemin ise müddei iddiasını isbattan âciz kaldıktan sonra
kendi talebi üzerine müddei aleyhe teklif olunmak iktiza ederek vekilin
yedinde bulunan vekâletnamede yemin teklifine mezuniyet-i sariha olmadıkça anın
işbu teklifi asilin teklifi hükmünde olamayacağı misillü böyle mezuniyet haricinde
vekil tarafından teklif olunan yeminin müddei aleyh tarafından kabul olunmasıyla
müddei asilin davadan sukûtu lâzım gelmeyeceğinden markum Evliye kadının
davasıyla emsali deavinin rüyet ve temyizinde bu veçhile muamele olunması tensib
olunmuş olmağın iktizası icra olunmak üzere Divan-ı Ahkam-ı Adliye’ye işbu
müzekkere ita olundu.

Fi 7 Rebiü’l-evvel sene 292

( Tercümanların esnâ-yı müzakerede huzuru hakkında muvakkat karar )
( Verildiğine dair tezkere-i samiye )

Hukuk ve Ceza Dairelerinde vukubulan istintak ve muhakemeden sonra müzakeratda
tercümanların bulundurulmaması hakkında şeref-tastir buyurulan tezkere-i samiyenin
suret-i matbuası umum sırasında 13 Zilkade sene 91 tarihinde
irsal kılınmış idi. Bu kere şeref-varid olan tezkere-i samiyede keyfiyet sefaretlere
tebliğ olundukda müttehidü’l-meal cevaben göndermiş oldukları takarirde karar-ı
mezkûrun uhud-ı cariye ve meriyeye muğayir ve muhalif bulunduğundan bahsle bazı