198

Gûne i'tirâzât ve mütâla'ât dermeyân etmiş olduklarından ve i'tirâzât-ı vâkı'anın ref'iyle işin bir netice-i marziyeye ifrâğı ise hayli vakte muhtâç bulunduğundan o vakte kadar bir takım eşhâsın de'âvî ve masâlih-i vâkı'aları te'ahhürden kurtulmak üzere muvakkaten tercümanların müzâkerâtda hâzır bulunmaları emr ve iş'âr buyurulmuş olmağla ol vechle icrâ-yı mu'âmele olunarak masâlih-i vâkı'anın hüsn-i cereyânı husûsuna himmet.

Fî 22 Rebî'ü'l-evvel sene 292 ve fî 17 Nîsân sene 291

----------------

( Mehâkim-i Nizâmiye da'vâ vekilleri hakkında nizâmnâmedir )

Fasl-ı Evvel

( Da'vâ vekâleti silkine duhûl ve kabûlün şerâiti beyânındadır )

Birinci Mâdde — Bizzât ikâme-i da'vâ etmek isteyenlerin müte'allikât ve akribâsından ve kendileriyle hukukça müşârik olanlardan ta'yîn edebilecekleri vekiller müstesnâ olmak şartıyla işbu nizâmnâme mûcibince Dîvân-ı Ahkâm-ı Adliye Nezâret-i Celîlesinin ruhsat-ı resmiyesini istihsâl etmeyenlerin mehâkim-i nizâmiyede da'vâ vekâleti etmeleri memnû'dur.

İkinci Mâdde — Mehâkim-i nizâmiyede da'vâ vekâleti edecek olanların evvelâ mekteb-i hukûka devâm ve tahsîl-i fünûn ile bi'l-imtihân ru'ûs alması veyâhud hâricde tahsîl-i ilm-i hukuk etmiş olub da mekteb-i hukuk nezdinde isbât-ı ma'lûmât ile yedinde bulunacak ru'ûs veyâ şehâdetnâmeyi tasdîk ettirmiş olması, sâniyen yirmi yaşına bâliğ olmuş bulunması, sâlisen me'mûriyet-i devletde bulunmaması, râbi'an mücâzât-ı terzîliye veyâ terhîbiye ile mahkûmen cezâ görmemiş olması, hâmisen tüccâr ve sarrâf silkinde bulunmuş olub da resmen izhâr-ı iflâs etmemiş veyâhud izhâr-ı iflâs eyledikten sonra kânûnen i'âde-i i'tibâr etmiş olması meşrûtdur.

Üçüncü Mâdde — Mâdde-i sâbıkada muharrer ma'lûmât ve sıfâtı hâiz olarak da'vâ vekâleti silkine dâhil olmak isteyenler Dîvân-ı Ahkâm-ı Adliye Nezâret ( Celîlesi )