307

Bir sene istihdam olunup da istifa veya infisali vukuundan sonra dava vekaletinde
bulunmak isteyenler imtihandan muaf tutularak birinci sınıfa kayd olunacaklardır
Mekteb-i Hukuk’dan birinci defa olarak bilâ-imtihan rüus ile talebe çıkdığı
tarihden sonra komisyonda imtihan icrasını terk ile dava vekaleti mesleğine
duhul mutlaka mekteb-i mezkûra devama veyahut mektebin tedrisatına muvafık
suretle mekteb nezdinde bi’l-imtihan isbat-ı malumata mevkuf tutulacaktır

( Hatime )

İşbu nizamnamenin ahkamı yalnız Dersaadet’de Divan-ı Ahkam-ı Adliye Nezaret-i
Celilesine merbut mehakim-i nizamiyede icra-yı vekalet edecek olanlara mahsusdur
Ve fasl-ı salisde gösterilen cemiyet-i daimenin evkat ve mahal-i içtimaiyle masarif-i
muktaziyenin tesviyesiçün dava vekaleti sınıfına dahil olanların verecekleri
iane ve sair bu gibi sermayenin suret-i idaresini şamil cemiyet marifetiyle
bir kararname layihası kaleme alınarak li-eceli’t-tedkik Divan-ı Ahkam-ı Adliye Nezaret-i
Celilesine ita kılınacaktır

( Ruhsatnameli dava vekillerinin ashab-ı deavidan alacakları )
( Ücretlerin tarifesidir )

( Bidayet mahkemelerinde rüyet olunan deaviye müteallik ücretlerin derecatı )
Birinci kısım bir dava sahibinin müddeası hakkında vuku bulacak müracaatı
üzerine ruhsatnameli vekil tarafından verilecek rayname için elli guruş
İkinci kısım asıl davayı havi bidayet mahkemesine re’sen ve cevaben
verilecek istidaname ile huzur-ı mahkemede dermiyan olunacak ifadat
ve itirazatı şamil tanzim edilecek layihalar için yüz elli kelimeyi tecavüz
etmediği halde otuz guruş ve yüz elli kelimeyi tecavüz eylediği takdirde
fazlasıçün her yüz kelimede beş guruş
Üçüncü kısım mezkûr nevinden olarak mahkemeye veyahut juj komiserliği
mahkeme canibinden tayin olunan memurlara verilecek istidaname ve protesto
ve acizname ve vekaletname gibi evrak ve senedatın tanzimi için yirmi guruş
Dördüncü kısım ilamat hakkında itiraz ale’l-hükm istidanamesi
tahriri için yirmi beş guruş