233

Onuncu Madde
Taht-ı istintakda hapis ve tevkif olunan erbab-ı cürüm ve cinayetin kaide-i mevzuası vechle yekdiğeriyle ihtilât edememelerine ve mehakim kararıyla ihtilâtdan men olunanların hariçden bir kimse ile görüşememelerine ve mahkemeler tarafından görülmedikçe mektup alıp verememelerine gardiyanlar dikkat edeceklerdir. Ve ihtilâtdan memnû olanlardan hafiyen mektup veren olur ise ele geçirilmesiyle beraber bulundukları mahallin en büyük memûrlarına irae eyleyeceklerdir.

On Birinci Madde
Gardiyanların hapishanelere duhullerinde yanlarında çakı ve bıçak gibi alet-i cariha ve silah bulunması ve hapisler hakkında muamele-i bâride göstermeleri memnûdur.

Fasl-ı Hâmis
( Mevadd-ı umumiye beyanındadır )

On İkinci Madde
Dördüncü maddede gösterildiği vechle her mahal hapishanelerinin hal ve vüs’at ve mahbusînin a’dadına göre yeniden intihab ve tayin olunacak gardiyanların maaşları hadd-i itidale riayeten taraf-ı hükümetten tahdid ve tahsis ve bu sınıfın efradına muhtacîn-i mahbusînin bir neferine verildiği miktar yevmî ekmek tayini ita kılınacaktır.

On Üçüncü Madde
Müstahdem bulunan gardiyanların maaşları her ay gayetinde miktarını mübeyyin ale’l-esami ita edecekleri istidanameler vilayetlerde Divan-ı Temyiz ve sancaklarda meclis-i temyizler ile kazalarda deavi meclisinden ba’de’t-tasdik tevzi ve ita kılınacaktır.

( Madde-i Mahsusa )

Vali ve mutasarrıf ve kaymakamlarla bi’l-umum mecalis rüesa ve azası her vakit hapishanelerin teftiş-i ahvaline ve mahbusînin istirahatlerine ve gardiyan sınıfının işbu talimat mucibince hizmetlerini ifa edip etmediklerine bakacaklardır. Ve mahbusîn-i mevcudeden dahi sual-i hal edeceklerdir. Gardiyanlardan gerek vazifelerini suistimal edenler ve gerek mahbusîn hakkında bir gûna hareket-i gayr-i layıkada bulunanlar olur ise hizmetlerinden tard ile haklarında kanunen muamele-i cezaiye icrası mukarrerdir.

Fî 11 Rebiülevvel sene 293 ve fî 25 Mart sene 292
( İstefan )