235

Muamelât-ı hazineye müteallik evrak-ı sairenin mikdarı bütçe ile birlikte her sene neşr ve ilan olunacak olan maliye nizamnamesinde tayin edilecektir. Tahvilât ve evrak-ı saire-i mezkûrenin tedavüle ihracı hususu Maliye Nazırı’na aid olacaktır.

Madde-i sabıkada beyan olunduğu vechle şayet bütçede gösterilen masarifatın haricinde olarak ba’zı ihtiyacat-ı mübreme ve fevkalâde zuhur eder veyahut hasılatın adem-i kifayetinden veyahut yanlış hesap olunmasından naşi bir açık görünecek olur ise o halde bütçeye ba’zı tahsisat-ı fevkalâdenin ilave ve idhaliyle def’-i zaruret veyahut ikmal-i noksan edilecektir.

İşbu tahsisat-ı fevkalâdenin bütçeye idhaline Bank-ı Osmanî tarafından muhalefet edilemeyecek ise de tahsisat-ı mezkûre bütçe komisyonu canibinden tasdik olunmak ve bir takım varidat-ı cedide ve mahsusa karşılığıyla kapatılmak iktiza edecektir.

Bank-ı Osmanî tarafından ita olunacak avanslar on altıncı maddede tayin kılınan mikdar-ı nihaiyi asla tecavüz etmemek içün marü’l-beyan tahsisat-ı fevkalâdeye mukabil Bank-ı Osmanî marifetiyle Hükûmet-i Seniyye’nin hesabına olarak ol babda tanzim ve ilan olunacak bir nizamname-i mahsus mucibince başkaca bir takım hazine tahvilâtı veyahut muamelât-ı hazineye müteallik evrak-ı saire ihrac veyahut bunun içün kezalik bir nizamname-i mahsus mucibince bir istikraz-ı umumî akd olunacaktır.

Bank-ı Osmanî Hükûmet-i Seniyye hesabına olarak gerek doğrudan doğruya ve gerek muhbirlerin marifetiyle nakden ve seneden ahz edeceği bilcümle mebaliğ ve icra edeceği kâffe-i te’diyat veyahut nakl-i nukud muamelâtı üzerine yüzde yarım komisyon ahz eyleyecektir.

Mezkûr komisyonun mikdarı işbu mukavelenamenin tarih-i imzasından itibaren altı sene müddet inkızasında ittifak-ı tarafeyn ile ta’dil olunabilecektir. Bank-ı Osmanî’nin en evvel te’sis etmiş olduğu veyahut te’sis edeceği on şubenin her biri içün tazminat olmak üzere kendisine maktuan senevî